കൊല്ലം: നടുറോഡില്‍ എസ്.ഐയേയും പൊലിസുകാരനേയും മര്‍ദിച്ച കേസില്‍ രണ്ട് എസ്.എഫ്.ഐ പ്രവര്‍ത്തകര്‍ അറസ്റ്റില്‍.
തേവലക്കര നടുവിലക്കര ആര്‍.കെ സദനത്തില്‍ ജിതിന്‍ പത്രോസ് (20), പന്മന വടുതല കൃപാലയം വീട്ടില്‍ അക്ഷയ് അശോക് (19) എന്നിവരാണ് ഇന്നലെ വൈകിട്ടോടെ പോലിസിന്റെ പിടിയിലായത്. ഇവര്‍ ചവറ ഗവ. കോളജ് വിദ്യാര്‍ഥികളാണ്. ചവറ പൊലിസ് സ്റ്റേഷനിലെ ഗ്രേഡ് എസ്.ഐ ഫ്രാന്‍സിസ് ഗ്രീക്ക്, സിവില്‍ പൊലിസ് ഓഫിസര്‍ ബനഡിക്റ്റ് എന്നിവര്‍ക്കാണ് മര്‍ദനമേറ്റത്.
ചവറ സര്‍ക്കാര്‍ കോളജിലെ മതില്‍ സ്വകാര്യ വ്യക്തി തകര്‍ത്തതുമായി ബന്ധപ്പെട്ട് എസ്.എഫ്.ഐ വ്യാഴാഴ്ച പ്രതിഷേധം സംഘടിപ്പിച്ചിരുന്നു. ഇതേസമയം തന്നെ ചവറ കെ.എം.എല്‍.എല്ലില്‍ മോക്ഡ്രില്ലും നടന്നിരുന്നു. ഈ സമയം കെ.എം.എം.എല്ലിലേക്ക് ഫയര്‍ഫോഴ്‌സ് വാഹനം കടത്തിവിടുന്നതിനായി തഹസില്‍ദാറുടെ നിര്‍ദേശത്തെ തുടര്‍ന്ന് എസ്.എഫ്.ഐയുടെ പ്രകടനം എസ്.ഐ തടഞ്ഞു. ഇതേ തുടര്‍ന്നാണ് പ്രകോപിതരായ വിദ്യാര്‍ഥികള്‍ ഡ്യൂട്ടിയിലുണ്ടായിരുന്ന പൊലിസുമായി വാക്കേറ്റമുണ്ടാവുകയും എസ്.ഐയേയും പൊലിസുകാരനേയും മര്‍ദിക്കുകയും ചെയ്തത്.
സംഭവം പുറത്തുവന്നതോടെ ഉന്നത അധികാരികള്‍
ഇടപെട്ടാണ് ഇവരെ പിടികൂടിയത്.