വണ്ടൂര്‍: കഴിഞ്ഞ നിയമസഭാ തെരഞ്ഞെടുപ്പിലെ മുഖ്യഎതിരാളികള്‍ ഇന്ന് ഒന്നിച്ച് വോട്ടുചോദിച്ച് തോളില്‍ കൈയിട്ടു നടക്കുന്ന കാഴ്ച കാണണമെങ്കില്‍ നേരെ വണ്ടൂരിലെത്തിയാല്‍ മതി. 2016 ലെ നിയമസഭാ തെരഞ്ഞെടുപ്പില്‍ വണ്ടൂരില്‍ എ.പി അനില്‍കുമാറിനെതിരേ മത്സരിച്ച എല്‍.ഡി.എഫ് സ്ഥാനാര്‍ഥി കെ.നിഷാന്ത് ആണ് ഇന്ന് അനില്‍കുമാറിന് വേണ്ടി വോട്ടഭ്യര്‍ഥനയുമായി രംഗത്തുള്ളത്. സി.പി.എം തുവ്വൂര്‍ ലോക്കല്‍ കമ്മിറ്റിയുടെ മുന്‍ സെക്രട്ടറിയായ നിഷാന്ത് നിലവില്‍ മുസ്‌ലിംലീഗിന്റെ പഞ്ചായത്ത് അംഗമാണ്.

കഴിഞ്ഞ നിയമസഭാ തെരഞ്ഞടുപ്പില്‍ വണ്ടൂര്‍ നിയോജക മണ്ഡലം എല്‍.ഡി.എഫ് സ്ഥാനാര്‍ഥിയായിരുന്നു തുവ്വൂര്‍ സ്വദേശിയായ കെ. നിഷാന്ത് എന്ന കണ്ണന്‍. സ്ഥാനാര്‍ഥിയായി നാട്ടുകാരന്‍ എത്തിയതുകൊണ്ടുതന്നെ പ്രവര്‍ത്തകരും ആവശത്തിലായിരുന്നു. എന്നാല്‍ നിഷാന്തിനെ തോല്‍പ്പിച്ച് അനില്‍കുമാര്‍ വിജയിച്ചു. നിഷാന്ത് പിന്നീട് സി.പി.എം വിട്ട് മുസ്‌ലിംലീഗില്‍ ചേര്‍ന്നു. കഴിഞ്ഞ തദ്ദേശ തെരഞ്ഞെടുപ്പില്‍ തുവ്വൂര്‍ അക്കരപ്പുറം വാര്‍ഡില്‍ മത്സരിച്ച് പഞ്ചായത്തംഗവുമായി. തുവ്വൂരില്‍ യു.ഡി.എഫിന്റെ മുന്നണി പോരാളികളില്‍ ഒരാളാണിന്ന് നിഷാന്ത്. അനില്‍കുമാറിന്റെ തെരഞ്ഞെടുപ്പ് പര്യടനങ്ങളില്‍ നിറസാന്നിധ്യവുമാണ്.

കഴിഞ്ഞ നിയമസഭാ തെരഞ്ഞെടുപ്പില്‍ എതിര്‍ചേരിയില്‍ മത്സരിച്ചവര്‍ ഇപ്പോള്‍ ഒരുമിച്ച് വോട്ടു തേടാനെത്തുന്നത് നാട്ടുകാരിലും കൗതുകമുണര്‍ത്തുന്നുണ്ട്.