മുഖ്യമന്ത്രി വര്‍ഗീയമായി ഭിന്നിപ്പിക്കുന്നു, സ്‌കൂള്‍ കെട്ടിട്ടം പണിയുന്നതല്ല വികസനമെന്ന് പ്രതിപക്ഷ നേതാവ് രമേശ് ചെന്നിത്തല. ഏകാധിപതിയായ പിണറായി വിജയന്‍ ഇനിയും വരണമെന്ന് ജനം ആഗ്രഹിക്കുന്നില്ലെന്നും ചെന്നിത്തല പറഞ്ഞു.

എട്ട് മാസം അരി പൂഴ്ത്തി വച്ച് പാവങ്ങളുടെ വയറ്റത്തടിച്ചത് എല്‍.ഡി.എഫ് സര്‍ക്കാരാണ്. ആളുകളെ പറ്റിക്കാനുള്ള ഇത്തരം നടപടികള്‍ ജനം തിരിച്ചറിയുമെന്നും ചെന്നിത്തല. പാവപ്പെട്ടവരുടെ വയറ്റത്തടിച്ച പ്രതിപക്ഷ നേതാവാണ് ചെന്നിത്തലയെന്ന സി.പി.എം സംസ്ഥാന സെക്രട്ടറി എ. വിജയരാഘവന്റെ പരാമര്‍ശത്തിന് മറുപടി പറയുകയായിരുന്നു അദ്ദേഹം.

ശബരിമല വിഷയത്തില്‍ കടകംപള്ളി സുരേന്ദ്രനെതിരായ എം.എം മണിയുടെ വിമര്‍ശനം ചൂണ്ടിക്കാട്ടി, ഏത് മന്ത്രിയാണ് വിഡ്ഢിത്തം പറയുന്നതെന്നാണ് ഇനി അറിയാനുള്ളതെന്ന് ചെന്നിത്തല പ്രതികരിച്ചു. വിശ്വാസ സമൂഹത്തിന്റെ വികാരങ്ങളെ ചവിട്ടിമെതിക്കുകയാണ് ഈ സര്‍ക്കാര്‍. ശബരിമല വിഷയത്തില്‍ സര്‍ക്കാര്‍ ജനങ്ങളെ വിഡ്ഢികളാക്കുകയാണെന്നും
അദ്ദേഹം കുറ്റപ്പെടുത്തി.