തിരുവനന്തപുരം
ഇരുപത് കോടി രൂപയ്ക്ക് മുകളിൽ വാർഷിക വിറ്റുവരവുള്ള വ്യാപാരികളുടെ ബിസിനസ് ടു ബിസിനസ് വ്യാപാര ഇടപാടുകൾക്ക് ഏപ്രിൽ ഒന്ന് മുതൽ ഇ ഇൻവോയ്‌സിങ് നിർബന്ധമാക്കി. 2017-2018 സാമ്പത്തിക വർഷം മുതൽ ഏതെങ്കിലും വർഷത്തിൽ 20 കോടിയോ അതിലധികമോ വാർഷിക വിറ്റ് വരവുള്ള വ്യാപാരികൾ ഒന്ന് മുതൽ ഇ ഇൻവോയ്‌സ് തയാറാക്കണം. ഇ ഇൻവോയ്‌സിങ് ബാധകമായ വ്യാപാരികൾ നികുതി ബാധ്യതയുള്ള ചരക്കുകൾക്കും സേവനങ്ങൾക്കും കൂടാതെ വ്യാപാരി നൽകുന്ന ക്രഡിറ്റ്,ഡെബിറ്റ് നോട്ടുകൾക്കും ഇ ഇൻവോയ്‌സ് തയാറാക്കണം. നിലവിൽ 50 കോടി രൂപയിലധികം വിറ്റ് വരവുള്ള വ്യാപാരങ്ങൾക്കാണ് ഇ ഇൻവോയ്‌സിങ് നിർബന്ധമാക്കിയിട്ടുള്ളത്. ഇതാണ് ഏപ്രിൽ ഒന്ന് മുതൽ 20 കോടി രൂപയായി കുറച്ചത്.
ഇ ഇൻവോയ്‌സ് എടുക്കാൻ ബാധ്യതയുള്ള വ്യാപാരികൾ ചരക്കു നീക്കം നടത്തുന്നതിന് മുമ്പ് തന്നെ ഇൻവോയ്‌സിങ് നടത്തണം. ഇതിനായി ജി.എസ്.ടി കോമൺ പോർട്ടൽ വഴിയോ അല്ലെങ്കിൽ ഇ ഇൻവോയ്‌സ് രജിസ്‌ട്രേഷൻ പോർട്ടൽ വഴിയോ രജിസ്‌ട്രേഷൻ എടുക്കണം. ഇ വേബിൽ പോർട്ടലിൽ രജിസ്‌ട്രേഷനുള്ള വ്യാപാരികൾക്ക് ആ ഐ.ഡി ഉപയോഗിച്ച് ഇ ഇൻവോയ്‌സിങ് പോർട്ടലിൽ ലോഗ് ഇൻ ചെയ്യാം.

ഇ ഇൻവോയ്‌സിങ് ബാധ്യതയുള്ള വ്യാപാരി ഇൻവോയ്‌സ് നടത്തിയില്ലെങ്കിൽ സ്വീകർത്താവിന് ഇൻപുട് ടാക്‌സ് ക്രെഡിറ്റിന് അർഹതയുണ്ടാവില്ല. ജി.എസ്.ടി നിയമ പ്രകാരം നികുതിരഹിതമായ ചരക്കുകൾ കൈകാര്യം ചെയ്യുന്ന വ്യാപാരികൾക്ക് ഇ ഇൻവോയ്‌സിങ് ആവശ്യമില്ല. സെസ് യൂനിറ്റുകൾ, ഇൻഷുറൻസ്, നോൺ ബാങ്കിങ് ഫിനാൻഷ്യൽ കമ്പനികൾ അടക്കമുള്ള ബാങ്കിങ് മേഖല, ഗുഡ്‌സ് ട്രാൻസ്‌പോർട്ടിങ് ഏജൻസികൾ, പാസഞ്ചർ ട്രാൻസ്‌പോർട്ട സർവീസ്, മൾട്ടിപ്ലക്‌സ് സിനിമ അഡ്മിഷൻ മേഖലകളെയും ഇ ഇൻവോയ്‌സിങ്ങിൽ നിന്നും ഒഴിവാക്കിയിട്ടുണ്ട്. ഇ ഇൻവോയ്‌സിങ് ബാധ്യതയുള്ള വ്യാപാരികൾ അവരവരുടെ വ്യാപാര സോഫ്റ്റ് വെയറിൽ വേണ്ട മാറ്റങ്ങൾ വരുത്തണമെന്ന് സംസ്ഥാന ചരക്ക് സേവന നികുതി കമ്മിഷണർ അറിയിച്ചു.