മഥുര
യു.പിയിലെ മഥുരയിൽ പശുക്കടത്ത് ആരോപിച്ച് മാലിന്യ വണ്ടി തടഞ്ഞു നിർത്തി ഡ്രൈവറെ മർദിച്ചു. ഞായറാഴ്ച രാത്രിയാണ് പിക്കപ് ഡ്രൈവർക്ക് ഒരു സംഘം ആളുകളുടെ മർദനമേറ്റത്.
മൃഗത്തിന്റെ എല്ല് വാഹനത്തിൽ കണ്ടതിനു പിന്നാലെയാണ് സംഘം വാഹനം തടഞ്ഞത്. 30 കാരനായ മുസ് ലിം യുവാവാണ് വാഹനം ഓടിച്ചിരുന്നത്.
പശുവിനെ കടത്തുകയാണെന്ന് ആരോപിച്ചായിരുന്നു മർദനം. മാലിന്യമാണ് വാഹനത്തിലുണ്ടായിരുന്നതെന്നും ഇതിൽ എല്ലുകളും മറ്റും ഉണ്ടായിരുന്നുവെന്നും പൊലിസ് പറഞ്ഞു. പശുവോ ബീഫോ ഉണ്ടായിരുന്നില്ലെന്നും പരുക്കേറ്റയാളെ ആശുപത്രിയിൽ ചികിത്സയ്ക്ക് വിധേയമാക്കിയെന്നും പൊലിസ് പറഞ്ഞു. ആക്രമണത്തിന്റെ വീഡിയോ സമൂഹ മാധ്യമങ്ങളിൽ വൈറലാണ്.
ഐ.പി.സിയിലെ വിവിധ വകുപ്പുകൾ ചേർത്ത് പൊലിസ് കണ്ടാലറിയാവുന്നവർക്കെതിരേ കേസെടുത്തു.