ഐടി മേഖലയില്‍ പിരിച്ചുവിടല്‍ തുടരുന്നു. ഗൂഗിളിന്റെ മാതൃകമ്പനിയായ ആല്‍ഫബെറ്റിലാണ് കൂട്ട പിരിച്ചുവിടല്‍. സാമ്പത്തികമേഖലയിലെ മാറ്റം മുന്‍നിര്‍ത്തി ആഗോളതലത്തില്‍ 12,000 ജീവനക്കാരെ ആല്‍ഫബെറ്റില്‍നിന്നു പിരിച്ചുവിടുമെന്നാണ് സിഇഒ സുന്ദര്‍ പിച്ചൈ അറിയിച്ചത്.

പിരിച്ചുവിടുന്നവര്‍ക്ക് ഇത് അറിയിച്ച് മെയില്‍ വഴി മെമോ നല്‍കി. ആല്‍ഫബെറ്റിലെ വിവിധ ഡിപ്പാര്‍ട്‌മെന്റുകളില്‍ ജോലി ചെയ്യുന്ന ജീവനക്കാരെ തീരുമാനം ബാധിക്കും. ആഗോളതലത്തിലാണ് നടപടിയെങ്കിലും യുഎസിലാകും ആദ്യം നടപ്പാക്കുകയെന്ന് ഗൂഗിള്‍ വ്യക്തമാക്കി.

പിന്നീട് മറ്റു രാജ്യങ്ങളിലും നടപ്പാക്കും.10,000 ജീവനക്കാരെ പിരിച്ചുവിടുമെന്ന് മൈക്രോസോഫ്റ്റ് അറിയിച്ചതിനു പിന്നാലെയാണ് ഐടി മേഖലയെ ഞെട്ടിച്ചുകൊണ്ട് ആല്‍ഫബെറ്റിന്റെയും നടപടി.