ടി. മുംതാസ്

കോഴിക്കോട്
സംസ്ഥാനത്തെ ഏകാധ്യാപക വിദ്യാലയങ്ങളിലെ അധ്യാപകർക്ക് വേതനം മുടങ്ങിയിട്ട് ആറുമാസം. വിവിധ ട്രൈബൽ,തീരദേശ മേഖലകളിലെ 272 ഏകാധ്യാപക വിദ്യാലയങ്ങളിലായി ജോലിചെയ്യുന്ന 344 അധ്യാപകർ ഇതോടെ നിത്യവൃത്തിക്ക് പോലും വകയില്ലാതെ ദുരിതത്തിലായി. വനാന്തരങ്ങളിലെയും ഒറ്റപ്പെട്ട സ്ഥലങ്ങളിലെയും കുട്ടികൾക്ക് അടിസ്ഥാന വിദ്യാഭ്യാസം നൽകുകയെന്ന ലക്ഷ്യത്തോടെ 1996ലാണ് ഏകാധ്യാപക വിദ്യാലയങ്ങൾ തുടങ്ങിയത്. നിരവധി തവണ നിവേദനം നൽകിയിട്ടും ഓണറേറിയം നൽകാൻ ഇതുവരെയും നടപടി സ്വീകരിച്ചിട്ടില്ല. ഓരോ വിദ്യാലയത്തിലും ഒന്നുമുതൽ നാലുവരെ ക്ലാസുകളിലെ കുട്ടികളെ പഠിപ്പിക്കേണ്ട ഉത്തരവാദിത്തം ഒരാൾക്കാണ്. മാത്രമല്ല, സ്‌കൂളിലെ പ്രധാനാധ്യാപകന്റെയും പ്യൂണിന്റെയും ചുമതല കൂടി വഹിക്കണം. ഇതിനൊന്നും മറ്റ് അലവൻസുകളൊന്നും അനുവദിച്ചിട്ടില്ല. പ്രതിമാസം 18,500 രൂപയാണ് നിലവിൽ വേതനമായി ലഭിക്കുന്നത്. 20 വർഷത്തിൽ അധികം സർവീസ് ഉള്ളവർക്കും ഇതേ വേതനമാണ് ലഭിക്കുക. മാത്രമല്ല കുട്ടികൾക്ക് ഉച്ചഭക്ഷണത്തിനുള്ള സാധനങ്ങളെല്ലാം സിവിൽ സപ്ലൈസ് ഡിപ്പോകളിൽ നിന്നു സ്‌കൂളിലെത്തിക്കുന്നതും ഏകാധ്യാപകരുടെ ചുമതലയാണ്.
100 രൂപയാണ് ഇതിന് സർക്കാരിൽ നിന്നുള്ള അലവൻസ്. ട്രൈബൽ മേഖലയിലേ സ്‌കൂളിലേക്ക് സാധനങ്ങൾ എത്തിക്കണമെങ്കിൽ 400 ഉം അധിൽ അധികവും വാഹനത്തിന് വാടകവരും. ഇത്തരത്തിൽ അധികം വരുന്ന പണവും സ്വന്തം കൈയിൽനിന്ന് ചെലവഴിക്കേണ്ട അവസ്ഥയാണ്. ഈ സാഹചര്യത്തിൽ മറ്റ് ജോലികൾ തേടേണ്ട ഗതികേടിലാണ് അധ്യാപകർ.ശമ്പളമുടക്കം എല്ലാ വർഷങ്ങളിലും പതിവാണെന്നും അധ്യാപകർ ചൂണ്ടിക്കാട്ടുന്നു. പാചകക്കാർ ഇല്ലാത്ത ദിവസങ്ങളിൽ അവരുടെ ഡ്യൂട്ടിയും ഏറ്റെടുക്കണം. മാത്രമല്ല കാട്ടുമൃഗങ്ങളുടെ ശല്യമുള്ള സ്ഥലങ്ങളിലെ സ്‌കൂളുകളിലേക്ക് എത്തുന്നത് തന്നെ അധ്യാപകർക്ക് വലിയ വെല്ലുവിളിയാണ്.