മൊഗ്രാല്‍ പുത്തൂര്‍: പഠനത്തിനൊപ്പം കാര്‍ഷികവൃത്തിയിലും സജീവമാകാനുള്ള ഒരുക്കത്തിലാണ് മൊഗ്രാല്‍ പുത്തൂര്‍ ഗവ.ഹയര്‍ സെക്കന്‍ഡറി സ്‌കൂള്‍ വിദ്യാര്‍ഥികള്‍. സ്‌കൂളിലെ 1300 വിദ്യാര്‍ഥികളും ഇക്കുറി വീട്ടില്‍ മത്സരബുദ്ധിയോടെ വിവിധയിനം കൃഷിയിറക്കും. ഇതിനായുള്ള പച്ചക്കറി വിത്തു വിതരണത്തിന്റെയും പച്ചക്കറി കൃഷിക്കായുള്ള കൈപ്പുസ്തകങ്ങളുടെയും വിതരണോദ്ഘാടനം മൊഗ്രാല്‍ പുത്തൂര്‍ ഗ്രാമപഞ്ചായത്ത് പ്രസിഡന്റ് എ.എ ജലീല്‍ നിര്‍വഹിച്ചു. ജൈവകൃഷിയെ പ്രോത്സാഹിപ്പിക്കുക, കുട്ടികളും രക്ഷിതാക്കളുമൊന്നിച്ച് കാര്‍ഷിക പ്രവര്‍ത്തനങ്ങളില്‍ ഏര്‍പ്പെടുക എന്നീ ലക്ഷ്യങ്ങളോടെയാണ് കുടുംബകൃഷി മത്സരം കഴിഞ്ഞ വര്‍ഷം മുതല്‍ ആരംഭിച്ചത്.
സ്‌കൂളിലെ ഇക്കോ ക്ലബ് മുന്‍കൈ എടുത്ത് മൊഗ്രാല്‍ പുത്തൂര്‍ കൃഷി ഓഫിസര്‍ ചവന നരസിംഹലുവിന്റെ നേതൃത്വത്തിലാണു കഴിഞ്ഞ വര്‍ഷം മത്സരം സംഘടിപ്പിച്ചത്. ഇത്തവണ പ്രദേശത്തെ ക്ലബുകളുടെ കൂടി സഹകരണത്തോടെ മത്സരം കൂടുതല്‍ വിപുലമാക്കിയിട്ടുണ്ട്. വിജയികള്‍ക്കു കാഷ് അവാര്‍ഡും സമ്മാനങ്ങളും നല്‍കും. ഉദ്ഘാടന ചടങ്ങില്‍ പി.ടി.എ പ്രസിഡന്റ് പി.ബി അബ്ദുല്‍ റഹ്മാന്‍ അധ്യക്ഷനായി. പ്രധാനധ്യാപകന്‍ കെ അരവിന്ദ, പ്രിന്‍സിപ്പല്‍ ഇന്‍ചാര്‍ജ് കെ ബാലകൃഷ്ണന്‍, മാഹിന്‍ കുന്നില്‍, മഹ്മൂദ് ബള്ളൂര്‍, വി.വി മുരളി, കെ രഘു, പി വേണുഗോപാലന്‍ എന്നിവര്‍ സംബന്ധിച്ചു.