റിയാദ്: തൊഴിലുടമകള്‍ പ്രവാസി തൊഴിലാളികളുടെ ശമ്പളം ഉള്‍പ്പെടെയുള്ള വിവരങ്ങള്‍ അവര്‍ രാജ്യത്ത് പ്രവേശിച്ചയുടന്‍ തന്നെ ജനറല്‍ ഓര്‍ഗനൈസേഷന്‍ ഫോര്‍ സോഷ്യല്‍ ഇന്‍ഷുറന്‍സ് (ഗോസി) പദ്ധതി പ്രകാരം സമര്‍പ്പിക്കണം. ഇലക്ട്രോണിക് സേവനങ്ങള്‍ വഴി ഡാറ്റ നല്‍കി രജിസ്‌ട്രേഷന്‍ നടപടിക്രമങ്ങള്‍ പൂര്‍ത്തിയാക്കാന്‍ തൊഴിലുടമകള്‍ക്ക് സാധിക്കുമെന്ന് ഗോസി അധികൃതര്‍ ഓര്‍മിപ്പിച്ചു.

ശമ്പളം ഉള്‍പ്പെടെയുള്ള പൂര്‍ണ വിവരങ്ങള്‍ അപ്‌ഡേറ്റ് ചെയ്യാന്‍ കാലതാമസമുണ്ടായാല്‍ അടുത്ത മാസം (ഫെബ്രുവരി ഒന്ന്) മുതല്‍ കംപ്യൂട്ടര്‍ സിസ്റ്റം തന്നെ വേതനം നിശ്ചയിക്കും. തൊഴിലുടമയും തൊഴിലാളിയും തമ്മിലുണ്ടാക്കിയ കരാര്‍പ്രകാരമുള്ള വിശദാംശങ്ങളാണ് ഓണ്‍ലൈനായി സമര്‍പ്പിക്കേണ്ടത്. ഇരുകക്ഷികളുടെയും അവകാശങ്ങള്‍ സംരക്ഷിക്കുന്നതിനാണിത്.

തൊഴില്‍ നല്‍കുന്ന സ്ഥാപനത്തിന്റെ അക്കൗണ്ടില്‍ ലോഗിന്‍ ചെയ്ത് ഇലക്ട്രോണിക് രീതിയില്‍ ഇടപാട് പൂര്‍ത്തിയാക്കിയ ശേഷം അപേക്ഷ സമര്‍പ്പിച്ച് 'മൈ ബിസിനസ് ഇന്‍ഷുറന്‍സ്' പ്ലാറ്റ്‌ഫോം വഴി തൊഴിലുടമകള്‍ക്ക് നടപടിക്രമങ്ങള്‍ പൂര്‍ത്തിയാക്കാം. ഗോസി വഴിയുള്ള ആനുകൂല്യങ്ങളും ഇന്‍ഷുറന്‍സ് പരിരക്ഷയും ലഭിക്കാന്‍ ഇത് നിര്‍ബന്ധമാണ്.