കെ.കെ പരമേശ്വരന്‍

പറയി പെറ്റ പന്തിരുകുലത്തിലെ പാക്കനാരുടെ ജന്മഗൃഹം എന്നറിയപ്പെടുന്ന ഈരാറ്റിങ്ങല്‍ തറവാട്ടില്‍ ജനിച്ച ഇ.എസ് വേലായുധന്‍ എഴുതിയ തൂമങ്ങള്‍ എന്ന നോവല്‍ ഇതുവരെ പറയാത്ത പറയരുടെ ജീവിതകഥയാണ് രേഖപ്പെടുത്തുന്നത്. ഈ നോവലിലൂടെ സ്വന്തം ജനതയുടെ ജീവിതം തന്നെയാണ് വേലായുധന്‍ പറയുന്നത്. അതാവട്ടെ കരുത്തുള്ള കഥാപാത്രങ്ങളേയും കാമ്പുള്ള കഥകളേയും സന്നിവേശിപ്പിച്ചാണ്.

ചരിത്രത്തിലില്ലാത്തവരുടെ കഥ എന്ന തലക്കെട്ട് തന്നെയാണ് തൂമങ്ങളുടെ ആമുഖം. അതുകൊണ്ടുതന്നെ ഏറെ വ്യത്യസ്തത പുലര്‍ത്തുന്നു ഈ നോവല്‍.
മരിച്ചയാളുടെ ആത്മാവിനെ ആവാഹിച്ച ചെറിയ മരപ്രതിമയ്ക്ക് പറയുന്ന പേരാണ് തൂമങ്ങള്‍. ചിത്രകലയും ഫോട്ടോയുമൊക്കെ പ്രചാരത്തിലാവുന്നതിനും നൂറ്റാണ്ടുകള്‍ക്ക് മുമ്പ് പറയര്‍ തങ്ങളുടെ മരണപ്പെട്ട മാതാപിതാക്കളുടേയും മറ്റും രൂപങ്ങള്‍ മരത്തിലും പീഠത്തിലുമൊക്കെ ആവാഹിച്ചുവെച്ചിരുന്നു എന്ന് പറയുമ്പോള്‍ ഈ വിഭാഗത്തിന്റെ മാതൃപിതൃ സ്മരണയുടെ പ്രാധാന്യം ഊഹിക്കാവുന്നതാണ്.

എഴുതിവയ്ക്കാന്‍ ആളും അര്‍ഥവും അക്ഷരവും അധികാരവും ഇല്ലാത്തതിനാല്‍ കീഴാളന്റെ ചരിത്രം ആദ്യം തെക്കന്‍ കാറ്റും പിന്നെ കാലവും പേരാറ്റിലെ വെള്ളം പോലെ എങ്ങോട്ടോ കൊണ്ടുപോവുകയും പിന്നീടത് എവിടെയോ കളയുകയുമാണ് ചെയ്തത് എന്ന് നോവലില്‍ പറയുന്നതുപോലെ തന്നെയാണ് പറയന്റെ ജീവിതം. അതുകൊണ്ടാണ് അവന്റെ കലകളും ജീവിതക്രമവും മറ്റും പിന്തള്ളപ്പെട്ടു പോയത്.

തമ്പ്രാക്കന്മാരുടെ പൂര്‍വികര്‍ ഈ മണ്ണില്‍ കാലുകുത്തുന്നതിനും എത്രയോ നൂറ്റാണ്ടുകള്‍ക്ക് മുമ്പേ പറയര്‍ ഇവിടെ ഉണ്ടായിരുന്നു. ഈ കാണുന്ന കാവും മണ്ണുമൊക്കെ അവരുടേതായിരുന്നു എന്നതിന് തെളിവാണ് അവരുടെ പാട്ടുകള്‍.

രാജഭരണം, ബ്രിട്ടിഷ് ഭരണം, ജനാധിപത്യം എന്നിവ ഈ നോവലില്‍ കാണാം. എങ്ങനെയാണ് ഇവയൊക്കെ പറയജീവിതത്തെ കീഴ്‌മേല്‍ മറിച്ചതെന്നും ഇതില്‍ വായിക്കാം. ഈ വിഭാഗത്തില്‍ അടിമത്തം എങ്ങനെ തുടര്‍ക്കഥയാവുന്നു എന്നും കാണാം. കൂടാതെ പഴയകാല ജീവിതരീതികളും സംസ്‌കാരവും ഇതില്‍ രേഖപ്പെടുത്തിയിരിക്കുന്നു. ഇതില്‍ തൃത്താല എന്ന ഗ്രാമവും ഭാരതപ്പുഴയും മാത്രമല്ല ചര്‍ച്ച ചെയ്യുന്നത്. ഇതിനോടനുബന്ധിച്ചുള്ള പല പ്രദേശങ്ങളും സംഭവങ്ങളും വ്യക്തികളും വാണിജ്യവും മറ്റും വായനക്കാരുടെ മുന്നിലെത്തുന്നു.
കരിനീലിയെ തേടിപ്പോവുന്ന മുത്തപ്പന്‍, കണ്ടന്റെ ബാധയൊഴിപ്പിക്കല്‍, കൊടിക്കുന്ന് വേല, കുമ്മട്ടിക്കാവ് തോറ്റം, പഴയകാല തമ്പുരാക്കന്‍മാരുടെ ചാത്തത്തിന് നടത്തിയിരുന്ന കഞ്ഞി പാര്‍ച്ച, മുന്‍കാലത്ത് ഉണ്ടായിരുന്ന കോളറ, 1921നെ ഓര്‍മിപ്പിക്കുന്ന കലാപം, അയ്യങ്കാളിയെ ഓര്‍മപ്പെടുത്തുന്ന വിപ്ലവം, ആര്‍.ബി ഭട്ടതിരിപ്പാടെന്ന വിശാല കോണ്‍ഗ്രസ് തുടങ്ങിയ നിരവധി ഒളിമങ്ങാത്ത ചിത്രങ്ങളും ഇതില്‍ തെളിഞ്ഞ് കാണാം.

ഭൂതകാലവും വര്‍ത്തമാനകാലവും ചര്‍ച്ച ചെയ്യുന്ന ഈ നോവലില്‍
'വെറ്റില കൊടുത്തു ബോധമാനം വാങ്ങണം,
നെല്ല് കൊടുത്തു സ്‌നേഹം വാങ്ങണം,
അരി കൊടുത്തു അക്ഷരം വാങ്ങണം,
മുണ്ട് കൊടുത്തു മുഖം തെളിയിക്കണം,
പണം കൊടുത്തു മനസ്സു തെളിയിക്കണം,
കള്ളു കൊടുത്തു കണക്കു വാങ്ങണം,
പൊന്നു കൊടുത്തു പൊരുളു വാങ്ങണം,
താരം കൊടുത്തു കുരുത്തം വാങ്ങണം'
എന്ന് ഐവര്‍പ്പാട്ടിനെ ഉദ്ധരിച്ച് ഇട്ടിയായി പറയുമ്പോള്‍ തന്നെ, കുഞ്ഞച്ചനെന്ന കോണ്‍ഗ്രസ്സുകാരന്‍ അത് തിരുത്തുന്നത് നോക്കൂ.
'കള്ള് വെടിഞ്ഞാലുള്ളം തെളിയും
ചാരായം കളഞ്ഞാലോ താരകമാകാം
ദൂരെ കളയൂ
കള്ളിന്‍ കുടങ്ങള്‍.
നടുനിവര്‍ത്താം
നമുക്ക് നാട്ടിലിറങ്ങാം
ഒത്തൊരുമിക്കാം
അറിവിന്‍ കൈത്തിരി തെളിയിക്കാം'
എന്നതിലേക്ക് മാറുന്നുണ്ട്. ഇത് കീഴാളര്‍ക്കിടയിലെ വലിയൊരു സന്ദേശം തന്നെയാണ്. ഇതില്‍ പഴയ കാലവും പുതിയ കാലവും വളരെ തന്മയത്വത്തോടെയാണ് രേഖപ്പെടുത്തിയിട്ടുള്ളത്.
പാട്ടുകളാല്‍ സമ്പന്നരാണ് പറയകുലം. അതുകൊണ്ടു തന്നെ പാങ്ങാട്ടിരി ഭഗവതിയുടെ വേല തുടങ്ങുന്നത് ഇങ്ങനെയാണ്:
'വേലാണ് വേലകളാണ്
തമ്പാട്ടിയമ്മയുടെ വേല,
ആനണ്ട് ആറാട്ടുണ്ട് തമ്പാട്ടിയമ്മയുടെ വേല,
കൊട്ടുണ്ട് കുഴല്‍വിളിയുണ്ട് തമ്പാട്ടിയമ്മയുടെ വേല,
തേരുണ്ട് തേരഴകുണ്ട് തമ്പാട്ടിയമ്മയുടെ വേല,
കാളണ്ട് കാളഴകുണ്ട് തമ്പാട്ടിയമ്മയുടെ വേല,
ലാരു ലാരുടെ കൊട്ടും പാട്ടും കേട്ടിട്ടാണ്
കുടിയിരുന്നത് നല്ലമ്മ,
പാക്കനാരുടെ കൊട്ടും തോറ്റവും കേട്ട്
കാവില്‍ കുടിയിരുന്നതാണ് നല്ലമ്മ'
എന്ന് പാടുമ്പോഴും പറയരുടെ കലയുടെ ഇഴയടുപ്പം ഇതില്‍ കാണാം.
നോവല്‍ എന്നതിനപ്പുറം പറയജീവിതത്തിന്റെ അടയാളങ്ങളും നൊമ്പരങ്ങളും കോറിയിട്ട തൂമങ്ങള്‍ ഏറെ ചര്‍ച്ച ചെയ്യപ്പെടുമെന്ന കാര്യത്തില്‍ തര്‍ക്കമില്ല. അതുകൊണ്ടുതന്നെ എഴുത്തുകാരനായ വി.ടി വാസുദേവന്‍ ആമുഖത്തില്‍ എഴുതിയതു പോലെ ചരിത്ര വിദ്യാര്‍ഥികള്‍ക്ക് ഒരു പഠനഗ്രന്ഥം കൂടിയാണ് തൂമങ്ങള്‍.
കേരള ഫോക്‌ലോര്‍ അക്കാദമി പ്രസിദ്ധീകരിച്ച 'പറയജീവിതത്തിന്റെ അടയാളങ്ങള്‍' എന്ന പുസ്തകവും ഇ.എസ് വേലായുധന്‍ എഴുതിയിട്ടുണ്ട്. മംഗളോദയം പ്രസിദ്ധീകരിച്ച തൂമങ്ങളുടെ വില 185 രൂപയാണ്.