കൊണ്ടോട്ടി: പുളിക്കല്‍ ഗ്രാമപഞ്ചായത്തിന്റെ ഉടമസ്ഥതയിലുളള മായക്കര അങ്കണവാടിയുടെ നവീകരണം  പാതിവഴിയിലായതായി ആക്ഷേപം. നാല്‍പതോളം വിദ്യാര്‍ഥികളുള്ള അങ്കണവാടിയുടെ  നവീകരണപ്രവൃത്തിയാണ് പാതിവഴിയില്‍ നിലച്ചത്. പഞ്ചായത്തിന്റെ ഉടമസ്ഥയിലുളള മൂന്ന് സെന്റ്  സ്ഥലത്താണ് സ്ഥാപനം പ്രവര്‍ത്തിക്കുന്നത്.
    കഴിഞ്ഞ സാമ്പത്തിക വര്‍ഷത്തില്‍ അങ്കണവാടിയുടെ നവീകരണത്തിനായി നാലു ലക്ഷം രൂപ അനുവദിക്കുകയും പ്രവൃത്തി നടത്തുന്നതിനുളള  ഭരണാനുമതി ലഭിക്കുകയും ചെയ്തിരുന്നു. ഓടിട്ട മേല്‍ക്കൂര മാറ്റി കോണ്‍്ക്രീറ്റ്  ചെയ്യുന്നതിനായിരുന്നു അനുമതി ലഭിച്ചത്. എന്നാല്‍ തെരഞ്ഞെടുപ്പ് പെരുമാറ്റചട്ടം വന്നതോടെ  നവീകരണപ്രവൃത്തി വൈകി. പുതിയ ഭരണസമിതി അധികാരത്തിലേറിയതോടെ ഗുണഭോക്തൃ സമിതിയുണ്ടാക്കുകയും ചെയ്തു. എന്നാല്‍ നിര്‍മാണം തുടങ്ങുന്നതിനാവശ്യമായ മുന്നൊരുക്കം നടത്താതെ  അധികൃതര്‍ മേല്‍ക്കൂരയും ചുമരും പൊളിച്ചുമാറ്റി. അഞ്ച് മാസമായിട്ടും മേല്‍ക്കൂരയും  ചുമരും പൊളിച്ചുമാറ്റിയെന്നല്ലാതെ നവീകരണപ്രവൃത്തികള്‍ തുടങ്ങാനായിട്ടില്ല.നിലവില്‍ അങ്കണവാടി സമീപത്തെ മറ്റൊരു കെട്ടിടത്തിലാണ് പ്രവര്‍ത്തിക്കുന്നത്. നിലവിലുളള സ്ഥിതിയില്‍ കെട്ടിടം പണിതാല്‍ സുരക്ഷാഭീഷണിയാണെന്നാണ് നാട്ടുകാര്‍ പറയുന്നത്.