ന്യൂഡല്‍ഹി: ഗുജറാത്ത് വംശഹത്യയെ കുറിച്ച് ബി.ബി.സി തയാറാക്കിയ ഡോക്യുമെന്ററി 'ഇന്ത്യ: ദ മോദി ക്വസ്റ്റ്യന്‍' ഡല്‍ഹി അംബേദ്കര്‍ സര്‍വ്വകലാശാലയിലും ഡല്‍ഹി സര്‍വകലാശാലയിലും ഇന്ന് പ്രദര്‍ശിപ്പിക്കും. വ്യാഴാഴ്ച വൈകുന്നേരം കൊല്‍ക്കത്തയിലെ ജാദവ്പൂര്‍ സര്‍വകലാശാലയില്‍ എസ്എഫ്‌ഐ ഡോക്യുമെന്ററി പ്രദര്‍ശിപ്പിച്ചിരുന്നു.

എസ്എഫ്‌ഐ ഹൈദരാബാദ് സര്‍വകലാശാലയിലും ഡോക്യുമെന്ററിയുടെ പ്രദര്‍ശനം സംഘടിപ്പിച്ചതായി പിടിഐ റിപ്പോര്‍ട്ട് ചെയ്തു. അതേസമയം, അവിടെ ആര്‍എസ്എസിന്റെ വിദ്യാര്‍ത്ഥി വിഭാഗമായ എബിവിപി വിവേക് അഗ്‌നിഹോത്രിയുടെ വിവാദ ചിത്രമായ 'ദ കശ്മീര്‍ ഫയല്‍സ്' ആണ് പ്രദര്‍ശിപ്പിച്ചത്.

ജെ.എന്‍.യുവില്‍ പ്രദര്‍ശനത്തിനിടെ എബിവിപി നടത്തിയ ആക്രമണത്തിനെതിരെ വിദ്യാര്‍ത്ഥി യൂണിയന്‍ ഇന്നലെ രാത്രി പ്രതിഷേധ മാര്‍ച്ച് സംഘടിപ്പിച്ചിരുന്നു. ജെ.എന്‍.യുവിലെയും ജാമിഅ മില്ലിയ യൂണിവേഴ്‌സിറ്റിയിലെയും വിദ്യാര്‍ത്ഥികള്‍ക്ക് ഐക്യദാര്‍ഢ്യം പ്രഖ്യാപിച്ച് ഓള്‍ ഇന്ത്യ സ്റ്റുഡന്റ് അസോസിയേഷന്‍ (എഐഎസ്എ) ഇന്ന് അംബേദ്കര്‍ സര്‍വകലാശാലയില്‍ പ്രതിഷേധത്തിന് ആഹ്വാനം ചെയ്തിട്ടുണ്ട്.

അതേസമയം ഡോക്യുമെന്ററിയോ ഡോക്യുമെന്ററിയുമായി ബന്ധപ്പെട്ട കാര്യങ്ങളോ സാമൂഹ്യ മാധ്യമങ്ങളില്‍ പങ്കുവയ്ക്കുന്നത് തടഞ്ഞുകൊണ്ടുള്ള കേന്ദ്രത്തിന്റെ നടപടി ഇപ്പോഴും തുടരുകയാണ്. ഡോക്യുമെന്ററിയുടെ രണ്ടാം ഭാഗം പുറത്തിറങ്ങിയതോടെ കേന്ദ്രസര്‍ക്കാര്‍ നിരീക്ഷണം കടുപ്പിച്ചിരിക്കുകയാണ്.