മേലാറ്റൂര്‍: ഷൊര്‍ണൂര്‍ നിലമ്പൂര്‍ റെയില്‍വേ പാതയിലെ പ്രധാന സ്റ്റേഷനായ മേലാറ്റൂര്‍ റെയില്‍വേ സ്റ്റേഷനില്‍ രോഗികളുള്‍പ്പെടെ നൂറുകണക്കിനു യാത്രക്കാരാണു നിത്യവും എത്തുന്നത്. എന്നാല്‍ പരാതികള്‍ മാത്രമാണ് ഇവിടെയെത്തുന്ന യാത്രക്കാര്‍ക്കു പറയാനുള്ളത്. സ്റ്റേഷനും പ്ലാറ്റ്‌ഫോമും റെയില്‍വേ നല്ല നിലയില്‍ മോടി പിടിപ്പിച്ചിട്ടുണ്ട്. എന്നാല്‍ പ്ലാറ്റ്‌ഫോമിലുള്ള നാലു വാട്ടര്‍ ടാപ്പുകളില്‍ മൂന്നും നശിച്ചു. ആകെയുള്ള ഒന്നില്‍ അപൂര്‍വമായേ വെള്ളം ഉണ്ടാവുകയുള്ളു. കുടിവെള്ളം നല്‍കാനാവശ്യമായ ഒരു സംവിധാനവും ഇവിടെയില്ല. പ്രാഥമിക കാര്യങ്ങള്‍ നിര്‍വഹിക്കാന്‍  ശൗചാലയമുണ്ടെങ്കിലും ഭദ്രമായ വാതിലില്ല.
അവശ്യ സന്ദര്‍ഭങ്ങളില്‍ യാത്രക്കാര്‍ പ്രയാസപ്പെടുകയാണ്. പ്ലാറ്റ്‌ഫോം വൃത്തിയാക്കാനാളില്ലാതെനശിക്കുന്നു. എന്‍.എസ്.എസ് വളണ്ടിയേഴ്‌സോ ,സന്നദ്ധ പ്രവര്‍ത്തകരോ മാത്രമാണു വൃത്തിയാക്കുന്നത് . കോണ്‍ക്രീറ്റ് സ്ലാബുകള്‍ പതിച്ച പ്ലാറ്റ്‌ഫോമിലൂടെ വഴുതി വീഴാതെനടക്കണമെങ്കില്‍ അഭ്യാസം പഠിക്കണം. മേലാറ്റൂര്‍ ടൗണില്‍ നിന്നും സ്റ്റേഷനിലേക്കുള്ള റോഡിന്റെ സ്ഥിതിയും അതിദയനീയമാണ്.
വര്‍ഷങ്ങളായി തകര്‍ന്നു കിടക്കുന്ന റോഡിലൂടെ മഴക്കാലമായതോടെ കാല്‍നടയാത്രപോലും ദുസ്സഹമാണ്. നിലമ്പൂര്‍- തിരുവനന്തപുരം രാജ്യറാണി എക്‌സ്പ്രസ് ഉള്‍പ്പെടെ 16 സര്‍വിസുകള്‍ ദിവസവുമുള്ളതിനാല്‍ രോഗികളുള്‍പ്പെടെ നൂറുകണക്കിനു യാത്രക്കാരാണു നിത്യവും ഇവിടെയെത്തുന്നത്. പല തവണ ബന്ധപ്പെട്ടവരുടെ ശ്രദ്ധയില്‍പ്പെടുത്തിയെങ്കിലും യുക്തമായ നടപടിയുണ്ടാകുന്നില്ലെന്നു ജീവനക്കാരും പറയുന്നു.