കൊച്ചി: സ്വര്‍ണക്കടത്ത് കേസ് പ്രതി സന്ദീപ് നായരുടെ മൊഴിയില്‍ എന്‍ഫോഴ്‌സ്‌മെന്റ് ഡയരക്ടറേറ്റിനെതിരെ ഞെട്ടിക്കുന്ന വിവരങ്ങളുണ്ടെന്ന് ക്രൈംബ്രാഞ്ച് ഹൈക്കോടതിയില്‍. അന്വേഷണത്തെ ബാധിക്കുന്നതിനാല്‍ ഇത് സംബന്ധിച്ച കൂടുതല്‍ വിവരങ്ങള്‍ വെളിപ്പെടുത്താന്‍ കഴിയില്ല. സന്ദീപ് നായരുടെ പരാതിയില്‍ രജിസ്റ്റര്‍ ചെയ്ത കേസിനെതിരേയുള്ള എന്‍ഫോഴ്‌സ്‌മെന്റ് ഡയരക്ടറേറ്റിന്റെ ഹരജി നിലനില്‍ക്കില്ലെന്നും ക്രൈംബ്രാഞ്ച് കോടതിയില്‍ വ്യക്തമാക്കി. സന്ദീപിന്റെ മൊഴിപ്പകര്‍പ്പ് മുദ്രവച്ച കവറില്‍ നല്‍കാമെന്നും ക്രൈംബ്രാഞ്ച് കോടതിയെ അറിയിച്ചു.

അന്വേഷണത്തിനെതിരായ ഇ.ഡിയുടെ ഹരജി തള്ളണമെന്നും ക്രൈംബ്രാഞ്ച് ആവശ്യപ്പെട്ടു. ഇ.ഡിക്കെതിരെ കേസ് എടുത്തതില്‍ ക്രൈംബ്രാഞ്ചിന് ഗൂഢലക്ഷ്യമില്ല. എന്നാല്‍ ഇ.ഡി ഹരജിക്കൊപ്പം പ്രസക്തമല്ലാത്ത രേഖകള്‍ നല്‍കിയതില്‍ ഗൂഢലക്ഷ്യങ്ങളുണ്ട്. അന്വേഷണത്തിന്റെ മറവില്‍ കേസുമായി ബന്ധമില്ലാത്തവര്‍ക്കെതിരെ വ്യാജതെളിവ് ഉണ്ടാക്കാന്‍ ഇ.ഡിക്ക് അധികാരമില്ലെന്നും ക്രൈംബ്രാഞ്ച് കോടതിയില്‍ വാദിച്ചു.

ക്രൈംബ്രാഞ്ച് കേസ് റദ്ദാക്കണമെന്നാവശ്യപ്പെട്ട് ഇ.ഡി ഡെപ്യൂട്ടി ഡയരക്ടര്‍ പി.രാധാകൃഷ്ണന്‍ നല്‍കിയ ഹരജിയിലാണ് വിശദമായ വാദം നടക്കുന്നത്. ഇന്നും വാദം തുടരും. സ്വര്‍ണക്കടത്ത് കേസില്‍ മുഖ്യമന്ത്രിക്കെതിരെ മൊഴി നല്‍കാന്‍ ഇ.ഡി സന്ദീപ് നായരേയും
സ്വപ്നയേയും നിര്‍ബന്ധിച്ചെന്ന മൊഴിയുടെ അടിസ്ഥാനത്തിലാണ് ക്രൈംബ്രാഞ്ച് ഇ.ഡിക്കെതിരെ കേസ് രജിസ്റ്റര്‍ ചെയ്തത്. ഇതിനെതിരെയാണ് ഇ.ഡി കോടതിയെ സമീപിച്ചിരിക്കുന്നത്.