തിരുവനന്തപുരം: ലോകായുക്ത നിയമഭേദഗതി ഓര്‍ഡിനന്‍സ് പുതുക്കി പുറത്തിറക്കാന്‍ സംസ്ഥാന മന്ത്രിസഭാ യോഗം തീരുമാനിച്ചു. ഓര്‍ഡിനന്‍സിന്റെ കാലാവധി തീരുന്ന സാഹചര്യത്തിലാണ് വീണ്ടും കാബിനറ്റ് പരിഗണനക്കെത്തിയത്.

അതേസമയം, യോഗത്തില്‍ സി.പി.ഐ എതിര്‍പ്പറിയിച്ചു. സി.പി.ഐയ്ക്ക് വ്യത്യസ്ത നിലപാടുണ്ടെന്ന് മന്ത്രി കെ. രാജന്‍ അറിയിച്ചു. എന്നാല്‍ ബില്‍ വരുമ്പോള്‍ ചര്‍ച്ച ആകാമെന്ന് മുഖ്യമന്ത്രിയും നിയമ മന്ത്രിയും ഉറപ്പ് നല്‍കി. ഇതിനോട് സിപിഐ യോജിച്ചു. ഓര്‍ഡിനന്‍സ് പുതുക്കല്‍ സാങ്കേതിക നടപടി മാത്രമാണെന്നാണ് നിയമ മന്ത്രി അറിയിച്ചത്.

നേരത്തെ ഓര്‍ഡിനന്‍സ് എതിര്‍പ്പില്ലാതെ അംഗീകരിച്ചതില്‍ പാര്‍ട്ടി മന്ത്രിമാരെ സിപിഐ നേതൃത്വം വിമര്‍ശിച്ചിരുന്നു. രാഷ്ട്രീയതീരുമാനമുണ്ടാകാതെയാണ് ഓര്‍ഡിനന്‍സ് ഇറക്കിയതെന്നായിരുന്നു സിപിഐയുടെ വാദം.

സി.പി.ഐ.യുടെ അഭിപ്രായവ്യത്യാസം ചര്‍ച്ചയിലൂടെ തീര്‍ക്കുമെന്ന് സിപിഎം. സംസ്ഥാന സെക്രട്ടറി കോടിയേരി ബാലകൃഷ്ണന്‍ പറഞ്ഞിരുന്നു.