മുക്കം:  തിരുവമ്പാടി പഞ്ചായത്ത് പദ്ധതി രൂപീകരണത്തില്‍ പ്രതിപക്ഷ മെമ്പര്‍ മാരുടെ വാര്‍ഡുകളോട് അവഗണന  കാണിച്ചെന്ന ആരോപണം അടിസ്ഥാനരഹിതമാണെന്നും ഇതിന്റെ പേരില്‍ യു.ഡി.എഫ് അംഗങ്ങള്‍ നടത്തുന്ന സമരം  രാഷ്ട്രീയ പ്രേരിതവും ദുരുദ്ദേശപരവുമാണെന്നും പഞ്ചായത്ത് പ്രസിഡന്റ് മുക്കത്ത് വാര്‍ത്താസമ്മേളനത്തില്‍  അറിയിച്ചു.
ചുരുങ്ങിയ കാലംകൊണ്ട് നിരവധി വികസന പ്രവര്‍ത്തനങ്ങള്‍ ആവിഷ്‌കരിച്ച പഞ്ചായത്തിന്റെ  പദ്ധതിക്ക് തുരങ്കം വയ്ക്കാന്‍ യു.ഡി.എഫ് നടത്തുന്ന സമരപ്രഹസനം തിരുവമ്പാടി ജനങ്ങളോടുള്ള  വെല്ലുവിളിയാണെന്നും അദ്ദേഹം പറഞ്ഞു.
പഞ്ചായത്തിന്റെ പൊതുവായ വികസനം ലക്ഷ്യമാക്കി  ആവിഷ്‌കരിച്ച പദ്ധതിയില്‍ പ്രതിപക്ഷാംഗങ്ങളുടെ വാര്‍ഡുകളില്‍ 20 ലക്ഷം രൂപ മുതല്‍ 70 ലക്ഷം രൂപ  വരെയുള്ള വികസന പ്രവൃത്തികള്‍ പ്ലാന്‍ ചെയ്തിട്ടുണ്ട്. ഇതിനു പുറമെ സര്‍ക്കാര്‍ പദ്ധതികളുമുണ്ട്.
തിരുവമ്പാടി  പഞ്ചായത്തില്‍ നിന്നുള്ള ബ്ലോക്ക് പഞ്ചായത്തംഗങ്ങളും ജില്ലാ പഞ്ചായത്തംഗങ്ങളും യു.ഡി.എഫ്  പ്രതിനിധികളാണ്. അവര്‍ക്കു ലഭിച്ച ഫണ്ട് വിഹിതം യു.ഡി.എഫ് അംഗങ്ങളുടെ വാര്‍ഡുകള്‍ക്കാണ്  നല്‍കിയത്.
ഇതെല്ലാമറിയുന്ന യു.ഡി. എഫ് ജനങ്ങളെ തെറ്റിദ്ധരിപ്പിക്കുകയും സമരം സംബന്ധിച്ച ചര്‍ച്ച മന:പൂര്‍വം പൊളിക്കുകയും പഞ്ചായത്തിന്റെ സുഗമമായ പ്രവര്‍ത്തനം തടസ്സപ്പെടുത്തുകയുമാണ്  ചെയ്യുന്നതെന്നും പ്രസിഡന്റ് പി.ടി.അഗസ്റ്റിന്‍ പറഞ്ഞു. വൈസ് പ്രസിഡന്റ് ഗീത വിനോദ് ,വികസന  സ്റ്റാന്റിങ്ങ് കമ്മിറ്റി ചെയര്‍മാന്‍ കെ.ആര്‍ ഗോപാലന്‍ എന്നിവരും വാര്‍ത്താ സമ്മേളനത്തില്‍ സംബന്ധിച്ചു.