സൂറിച്ച്: ഒരിടവേളയ്ക്ക് ശേഷം ഫിഫ റാങ്കിങ്ങിന്റെ തലപ്പത്തേക്ക് തിരിച്ചെത്തി ബ്രസീല്‍. ഇന്ന് പുറത്തുവിട്ട പുതിയ റാങ്കിങ്ങിലാണ് കാനറിപ്പട ഒന്നാം സ്ഥാനത്തെത്തിയത്. ഇതോടെ ഒന്നാം സ്ഥാനം നഷ്ടമായതാവട്ടെ, ദീര്‍ഘനാളുകളായി പദവി അലങ്കരിച്ചിരുന്ന ബെല്‍ജിയത്തിന്.
കഴിഞ്ഞ ദിവസങ്ങളില്‍ നടന്ന രണ്ട് ലോകകപ്പ് യോഗ്യതാ മത്സരങ്ങളിലും തകര്‍പ്പന്‍ വിജയം നേടിയതോടെയാണ് ബ്രസീല്‍ ഒന്നാം സ്ഥാനം പിടിച്ചെടുത്തത്. അതേസമയം രണ്ട് സൗഹൃദമത്സരം കളിച്ച ബെല്‍ജിയം ഒരോ ജയവും സമനിലയും നേടിയതാണ് അവര്‍ക്ക് വിനയായത്.

ഫ്രാന്‍സാണ് മൂന്നാമത്. അര്‍ജന്റീന നാലാമതും ഇംഗ്ലണ്ട് അഞ്ചാമതുമാണ്. ഇറ്റലി, സ്‌പെയിന്‍, പോര്‍ച്ചുഗല്‍, മെക്‌സിക്കോ, നെതര്‍ലന്‍ഡ്‌സ് എന്നിവരാണ് ആദ്യ പത്തിലുള്ള മറ്റ് ടീമുകള്‍.