കൊളംബോ കടുത്ത സാമ്പത്തിക പ്രതിസന്ധിയെ തുടർന്ന് ജനജീവിതം ദുസഹമായ ശ്രീലങ്കയിൽ സർക്കാർ വിരുദ്ധ പ്രക്ഷോഭം. പ്രസിഡന്റ് ഗോതബായ രാജപക്‌സെ രാജിവയ്ക്കണമെന്ന് ആവശ്യപ്പെട്ട് മിരിഹാനയിലെ വസതിക്കു പുറത്ത് പ്രതിഷേധം നടത്തിയവർ വീട്ടിലേക്കുള്ള കവാടം തടസപ്പെടുത്തി നിർത്തിയ സൈനിക ബസൂകൾക്കു നേരെ കല്ലേറു നടത്തി.മിരിഹാനയിൽ അക്രമാസക്തരായ പ്രക്ഷോഭകർ ഒരു പൊലിസ് ബസും പൊലിസ് ജീപ്പും രണ്ട് ബൈക്കുകളും കത്തിച്ചതോടെ പൊലിസ് ജലപീരങ്കിയും കണ്ണീർവാതകവും പ്രയോഗിച്ചു. അതിനിടെ സമരക്കാർ ജലപീരങ്കിലുടെ ട്രക്ക് നശിപ്പിച്ചു. ദലുഗാമയിൽ ജനം തെരുവിൽ മരത്തടികളും ടയറും കത്തിച്ച് ഗതാഗതം തടസപ്പെടുത്തി. പ്രക്ഷോഭകർ ഇരമ്പിയെത്തി ആക്രമണം നടത്തിയതോടെ വ്യാഴാഴ്ച രാത്രി വടക്കൻ കൊളംബോയിലും തെക്കുഭാഗത്തും നഗെഗോഡയിലും കർഫ്യൂ പ്രഖ്യാപിച്ചു. എന്നാൽ ഇതു വകവയ്ക്കാതെ ജനം തെരുവിലിറങ്ങിയതോടെ രാവിലെ കർഫ്യൂ പിൻവലിച്ചു. അക്രമസംഭവങ്ങളിൽ ഒരു എ.സി.പി ഉൾപ്പെടെ അഞ്ചു പൊലിസുകാർക്ക് പരുക്കേറ്റു. അക്രമങ്ങൾക്കു പിന്നിൽ തീവ്രവാദികളാണെന്ന് പ്രസിഡന്റ് ഗോതബായ രാജപക്‌സെആരോപിച്ചു.