ന്യൂഡൽഹി: കോൺഗ്രസ്, ഇടതു പാർട്ടികൾ, സംസ്ഥാന പാർട്ടികൾ എന്നിവർ ബി.ജെ.പിക്ക് എതിരേ സഖ്യമുണ്ടാക്കി പ്രവർത്തിക്കണമെന്ന് തമിഴ്‌നാട് മുഖ്യമന്ത്രിയും ഡി.എം.കെ നേതാവുമായ എം.കെ സ്റ്റാലിൻ വാർത്താ ഏജൻസിക്ക് നൽകിയ അഭിമുഖത്തിൽ പറഞ്ഞു. മൂന്നു ദിവസത്തെ ഡൽഹി സന്ദർശനത്തിനെത്തിയതായിരുന്നു സ്റ്റാലിൻ. ഇന്ത്യയെ രക്ഷിക്കാൻ എല്ലാ പാർട്ടികളും ഒന്നായി പ്രവർത്തിക്കണം. കോൺഗ്രസ് മറ്റു പാർട്ടികളുമായി സൗഹൃദം ഉണ്ടാക്കണം. ഇന്ത്യയുടെ വൈവിധ്യം, ഫെഡറലിസം, ജനാധിപത്യം, മതേതരത്വം, തുല്യത, സംസ്ഥാനങ്ങളുടെ അവകാശം, വിദ്യാഭ്യാസ അവകാശം എല്ലാം സംരക്ഷിക്കേണ്ടതുണ്ട്. ഇതിനായി ബി.ജെ.പി ഇതര പാർട്ടികൾ ഐക്യത്തോടെ പ്രവർത്തിച്ച് ശക്തിപ്രകടനം കാണിക്കേണ്ടതുണ്ടെന്നും അദ്ദേഹം പറഞ്ഞു.