തിരുവനന്തപുരം: കരിങ്കല്ലുമായി പോയ ലോറിയില്‍ നിന്നും കരിങ്കല്ല് തെറിച്ചുവീണ് ബി.ഡി. എസ്. വിദ്യാര്‍ഥിയായ മുക്കോല സ്വദേശി അനന്തു മരിച്ച സംഭവത്തില്‍ സംസ്ഥാന മനുഷ്യാവകാശ  കമ്മീഷന്‍ സ്വമേധയാ കേസെടുത്തു. 

സുരക്ഷാ വീഴ്ച പരിശോധിച്ച് ജില്ലാ കലക്ടറും ജില്ലാ പൊലീസ് മേധാവിയും 10  ദിവസത്തിനകം  റിപ്പോര്‍ട്ട്  സമര്‍പ്പിക്കണമെന്ന് കമ്മീഷന്‍  ആക്റ്റിങ് ചെയര്‍പേഴ്‌സണും ജുഡീഷ്യല്‍  അംഗവുമായ  കെ. ബൈജൂനാഥ്  ആവശ്യപ്പെട്ടു. ഏപ്രില്‍ 2 ന് തിരുവനന്തപുരം കമ്മീഷന്‍  ഓഫീസില്‍ നടക്കുന്ന സിറ്റിംഗില്‍ കേസ്  പരിഗണിക്കും. വാര്‍ത്തയുടെ അടിസ്ഥാനത്തിലാണ് നടപടി. 

ഇന്ന് രാവിലെയാണ് മുക്കോലയില്‍ വെച്ച് അപകടം ഉണ്ടായത്. അനന്തുവിന്റെ വീടിന് അടുത്തുവെച്ചായിരുന്നു അപകടം.വിഴിഞ്ഞം തുറമുഖ നിര്‍മ്മാണത്തിനായി കല്ലുകള്‍ കൊണ്ടുപോയ ടിപ്പര്‍ ലോറി റോഡിലെ കുഴിയിലേക്കിറങ്ങിയപ്പോള്‍ കല്ല് പുറത്തേക്ക് തെറിക്കുകയായിരുന്നു. അനന്തുവിന്റെ വാഹനത്തിനു പുറത്തേക്കായിരുന്നു കല്ല് വീണത്. ടിപ്പര്‍ അമിത വേഗത്തിലാണ് വന്നതെന്ന് നാട്ടുകാര്‍ പറയുന്നു. തുറമുഖ നിര്‍മ്മാണത്തിനായി കല്ലുകള്‍ കൊണ്ടുപോകുന്ന ടിപ്പറുകളുടെ അമിതവേഗത്തിനെതിരെ നേരത്തെ പരാതി ഉണ്ടായിരുന്നു.