അങ്കാറ: ലോകമെമ്പാടുമുള്ള ഇസ്‌ലാംമത വിശ്വാസികള്‍ റമദാന്‍ നോമ്പിന്റെ പുണ്യത്തിലാണ്. കളിക്കിടയിലും വിശ്വാസം കൈവിടാത്ത നിരവധി താരങ്ങള്‍ വിവിധ കായിക ഇനങ്ങളിലുണ്ട്. കളിക്കിടെ ഗ്രൗ@ണ്ടില്‍ വെച്ച് നോമ്പ് തുറക്കുന്ന ഫുട്ബാള്‍ താരങ്ങളുടെ വിഡിയോയാണ് വൈറലാകുന്നത്. 

 

തുര്‍ക്കിഷ് ഫുട്ബാള്‍ ലീഗ് മത്സരത്തിനിടെയായിരുന്നു ഇരു ടീമുകളിലേയും താരങ്ങള്‍ നോമ്പ് തുറന്നത്. മത്സരം 10 മിനുട്ട് പിന്നിട്ട സമയത്ത് മഗ്‌രിബ് ബാങ്ക് വിളിച്ചപ്പോള്‍ താരങ്ങള്‍ സൈഡ് ലൈനിലെത്തി നോമ്പ് തുറക്കുകയായിരുന്നു. ഗോള്‍ കീപ്പര്‍ പോസ്റ്റ് ബാറിന് താഴെയിരുന്ന് നോമ്പ് തുറക്കുന്നതും വീഡിയോയില്‍ കാണാം. 

ലോകകപ്പ് യോഗ്യത മത്സരത്തിനിടെ നോമ്പ് തുറക്കുന്ന തുനീഷ്യന്‍ താരങ്ങളുടെ ചിത്രങ്ങള്‍ നേരത്തെ വൈറലായിരുന്നു. മത്സരത്തിനിടെ ഗോള്‍ കീപ്പര്‍ പരുക്ക് അഭിനയിച്ചായിരുന്നു അന്ന് മറ്റു താരങ്ങള്‍ക്ക് നോമ്പ് തുറക്കുന്നതിനുള്ള അവസരം നല്‍കിയത്.