മുംബൈ
മഹാരാഷ്ട്രയിലെ പള്ളികളിൽനിന്ന് ഉച്ചഭാഷിണികൾ നീക്കണമെന്നും ഇല്ലെങ്കിൽ പള്ളികൾക്ക് മുന്നിൽ ഹനുമാൻ ചാലിസ ചൊല്ലുമെന്നുമുള്ള മഹാരാഷ്ട്ര നവ നിർമാൺ സേന (എം.എൻ.എസ്) അധ്യക്ഷൻ രാജ് താക്കറെയുടെ പ്രസ്താവനയ്‌ക്കെതിരേ ശിവസേന. രാജ്യത്തെ നിയമം അനുസരിച്ചാണ് കാര്യങ്ങൾ നടക്കുന്നതെന്നും ബി.ജെ.പി ഭരിക്കുന്ന ഏതെങ്കിലും സംസ്ഥാനത്ത് ഇതു നടപ്പാക്കിയിട്ടുണ്ടോയെന്നും ശിവസേന എം.പി സഞ്ജയ് റാവത്ത് ചോദിച്ചു.
ശനിയാഴ്ച മുംബൈ ശിവാജി പാർക്കിൽ നടന്ന പരിപാടിയിലാണ് രാജ് താക്കറെ വിദ്വേഷ പ്രസംഗം നടത്തിയത്. മഹാരാഷ്ട്രയിൽ രാജ്യത്തെ നിയമം തുടരുമെന്നും ഇതിനായി ആഭ്യന്തര മന്ത്രിയുണ്ടെന്നും റാവത്ത് പറഞ്ഞു.

മഹാരാഷ്ട്രയിലെ മുസ് ലിം ഭൂരിപക്ഷ പ്രദേശത്തെ പള്ളികളിൽനിന്ന് ഉച്ചഭാഷിണികൾ നീക്കണമെന്നും ഈ പ്രദേശത്തുള്ളവർ പാകിസ്താൻ അനുകൂലികളാണെന്നുമാണ് താക്കറെ പ്രധാനമന്ത്രി നരേന്ദ്ര മോദിയോട് അഭ്യർഥിച്ചത്.
രാജ് താക്കറെയുടേത് ജാതി രാഷ്ട്രീയമാണെന്ന് ശിവസേന സഖ്യകക്ഷിയായ എൻ.സി.പി നേതാവ് ശരദ് പവാർ പറഞ്ഞു.