ചെന്നൈ: മുൻ ബിജെപി നേതാവും ന്യൂനപക്ഷ വിരുദ്ധ പ്രസ്താവനകൾ നടത്തുകയും ചെയ്ത ലക്ഷ്മണ ചന്ദ്ര വിക്ടോറിയ ഗൗരിയെ മദ്രാസ് ഹൈക്കോടതിയിലെ ജഡ്ജിയാക്കിയതിൽ വിവാദം ഉയരുന്നു. മദ്രാസ് ഹൈക്കോടതി അഡീഷണൽ ജഡ്ജിയായിട്ടാണ് ഗൗരിയെ നിയമിച്ചത്. ഇതിനെതിരെ നിരവധി പരാതികൾ ഉയർന്നു. ഗൗരിയുടെ നിയമനത്തെ ചോദ്യം ചെയ്തുള്ള ഹരജികൾ നാളെ സുപ്രീം കോടതി പരിഗണിക്കും.

ന്യൂനപക്ഷങ്ങൾക്കെതിരെ ഗൗരി നടത്തിയ പ്രസ്താവനകൾ നേരത്തെ വലിയ വിവാദമായിരുന്നു. ആര്‍ എസ് എസിന്‍റെ മുഖപത്രമായ ഓര്‍ഗനൈസറില്‍ ന്യൂനപക്ഷ വിരുദ്ധമായി വിക്ടോറിയ ഗൗരി എഴുതിയ ലേഖനമാണ് വിമർശനങ്ങൾക്ക് വഴിവെച്ചത്. ഇതിനു പിന്നാലെയാണ് മദ്രാസ് ഹൈക്കോടതിയുടെ മധുരാ ബെഞ്ചിൽ അഭിഭാഷകയായിരുന്ന ഗൗരിയെ മദ്രാസ് ഹൈക്കോടതി അഡീഷണൽ ജഡ്ജിയായി പരിഗണിച്ചത്.

വിക്ടോറിയ ഗൗരി ഉൾപ്പെടെ അഞ്ചു പേരെയാണ് മദ്രാസ് ഹൈക്കോടതി ജഡ്ജിമാരായി നിയമിക്കാൻ ജനുവരി 17-ന് സുപ്രീംകോടതി കൊളീജിയം ശുപാർശ ചെയ്തത്. വിവരം പുറത്തുവന്നതോടെ ഗൗരിയെ ജഡ്ജിയായി നിയമിക്കരുതെന്ന് കാട്ടി ചീഫ് ജസ്റ്റിസിനും രാഷ്ട്രപതിക്കും പരാതികളെത്തി. വിക്ടോറിയ ഗൗരിയുടെ നിലപാടുകള്‍ ഭരണഘടനാ മൂല്യങ്ങള്‍ക്ക് നിരക്കുന്നതല്ലെന്നും ഇങ്ങനെയൊരാളെ ഹൈക്കോടതി ജഡ്ജിയായി നിയമിക്കുന്നത് അധാർമ്മികമാണെന്നും കാട്ടി മദ്രാസ് ഹൈക്കോടതിയിലെ ഒരു കൂട്ടം അഭിഭാഷകർ സുപ്രീം കോടതിയെ സമീപിച്ചു.

ചീഫ് ജസ്റ്റിസ് ഡി വൈ ചന്ദ്രചൂഡ് അധ്യക്ഷനായ ബെഞ്ചിന് മുന്നിലെത്തിയ ഹർജി വെള്ളിയാഴ്ച്ച പരിഗണിക്കാമെന്ന് കോടതി വ്യക്തമാക്കി. ഇതിന് പിന്നാലെ നിയമന ഉത്തരവ് ഇറാനിയതോടെയാണ് ഹരജി നാളെ തന്നെ പരിഗണിക്കാമെന്ന് കോടതി അറിയിച്ചത്.