ദോഹ: കാലഹരണപ്പെട്ട ഇന്‍ഡ്യന്‍ കുടിയേറ്റ നിയമം മാറ്റി പ്രവാസികള്‍ക്ക് സുരക്ഷയും സേവനവും നല്കുന്ന ഒരു സമഗ്ര ഇന്‍ഡ്യന്‍ കുടിയേറ്റ നിയമം അനിവാര്യമാണെന്ന് പി.ടി കുഞ്ഞുമുഹമ്മദ്. ഇന്‍ഡ്യന്‍ പാര്‍ലമെന്റ് പുതിയ കുടിയേറ്റ നിയമം പാസ്സാക്കണം. സംസ്‌കൃതി പ്രഭാഷണ പരമ്പരയുടെ ഇരുപതാം അദ്ധ്യായത്തില്‍ പങ്കെടുത്ത് സംസാരിക്കുകയായിരുന്നു അദ്ദേഹം. കൂടുതല്‍ ആനൂകല്യങ്ങള്‍ ലഭിക്കുന്ന രീതിയില്‍ നിലവിലെ പ്രാവാസി ക്ഷേമനിധി നിയമം പൊളിച്ചെഴുതണം. മറ്റ് ക്ഷേമനിധികള്‍ക്ക് പ്രായപരിധി ഇല്ലാത്തപ്പോള്‍ പ്രവാസി ക്ഷേമനിധിയില്‍ ചേരുന്നതിന് പ്രായപരിധി വെച്ചിട്ടുണ്ട്. ഈ ആവശ്യങ്ങള്‍ പ്രവാസി സംഘടനകള്‍ കേരള കേന്ദ്ര സര്‍ക്കാരിന് മുന്നില്‍ സമര്‍പ്പിക്കണം. കേരള പ്രവാസി സംഘം ഇതടക്കം, പ്രവാസികളെ ബാധിക്കുന്ന നിരവധി വിഷയങ്ങള്‍ സര്‍ക്കാരിന് മുന്നില്‍ സമര്‍പ്പിച്ചിട്ടുണ്ട്. പ്രവാസം ഭാരത്തിനും, വിശിഷ്യാ കേരളത്തിനും നല്കിയ സാമ്പത്തിക സാമൂഹിക ഉന്നമനം വളരെ വലുതാണ്. തങ്ങളുടെ ചിന്തകളേയും, ചരിത്രബോധത്തേയും, പ്രവര്‍ത്തനങ്ങളേയും ഏകോപിപ്പിച്ച് കൊണ്ട് സമാധാനത്തിനും, മതേതരത്വത്തിനും വേണ്ടിയുള്ള പതാകവാഹകരായി പ്രവാസികള്‍ മാറണമെന്ന് അദ്ദേഹം ഓര്‍മ്മിപ്പിച്ചു. പ്രവാസികള്‍ കൂടുതല്‍ സാമ്പത്തിക അച്ചടക്കം പാലിക്കേണ്ടതുണ്ട്. പ്രവാസം കേരളത്തിലെ ദളിത് മേഖലയില്‍ പകര്‍ന്ന നേട്ടങ്ങളെക്കുറിച്ച് ആത്മപരിശോധന നടത്തേണ്ടതുണ്ടെന്നും പി.ടി പറഞ്ഞു.

ഐ.സി.സി അശോക ഹാളില്‍ നടന്ന പ്രഭാഷണ പരമ്പരയില്‍ സംസ്‌കൃതി പ്രസിഡന്റ് എ.കെ ജലീല്‍, ജനറല്‍ സിക്രട്ടറി കെ കെ ശങ്കരന്‍, വൈസ് പ്രസിഡന്റ് എം.ടി മുഹമ്മദാലി എന്നിവര്‍ സംസാരിച്ചു.