വാഷിങ്ടണ്‍: അമേരിക്കന്‍ വിമാന കമ്പനിയായ യുനൈറ്റഡ് എയര്‍ലൈന്‍സ് ഫ്‌ലൈറ്റില്‍ യാത്രയ്ക്കിടെ തീപിടുത്തം. നെവാര്‍ക്കിലേക്ക് പുറപ്പെട്ട വിമാനം അപകടത്തെ തുടര്‍ന്ന് സാന്റിയാഗോയില്‍ തിരിച്ചിറക്കി. ലാപ്‌ടോപ് ബാറ്ററിക്ക് തീപിടിച്ചതിനെ തുടര്‍ന്ന് പരുക്കേറ്റ നാലു പേരെ ആശുപത്രിയിലേക്ക് മാറ്റി.

യുനൈറ്റഡ് ഫ്‌ലൈറ്റ്-2664ലെ ജീവനക്കാരുടെ സമയോചിത ഇടപെടലിലൂടെയാണ് വന്‍ ദുരന്തം വഴിമാറിയതെന്ന് സാന്റിയാഗോ ഫയര്‍ ഡിപാര്‍ട്ട്‌മെന്റിന്റെ ട്വീറ്റില്‍ പറയുന്നു. കാബിന്‍ ക്രൂ തീ പടരുന്നത് നിയന്ത്രിക്കുകയും പൈലറ്റ് അടിയന്തരമായി വിമാനം തിരിച്ചിറക്കുകയുമായിരുന്നുവെന്ന് സാന്റിയാഗോ ഇന്റര്‍നാഷണല്‍ എയര്‍പോര്‍ട്ട് വക്താവ് സബ്രീന ലോപിക്കോളോ പ്രതികരിച്ചു.

ലാപ്‌ടോപ് ബാറ്ററിയില്‍ നിന്നാണ് തീപിടിത്തമുണ്ടായതെന്നും കൂടുതല്‍ അന്വേഷണം നടത്തുമെന്നും എഫ്.എ.എ വക്താവ് ഇയാന്‍ ഗ്രിഗര്‍ പറഞ്ഞു. യാത്രക്കാരെ ലക്ഷ്യസ്ഥാനങ്ങളില്‍ എത്തിക്കാനുള്ള ക്രമീകരണങ്ങള്‍ ചെയ്തതായി യുനൈറ്റഡ് എയര്‍ലൈന്‍സ് അറിയിച്ചു.