ദോഹ: ഗതാഗത നിയമ ലംഘനവുമായി ബന്ധപ്പെട്ട കേസുകളിൽ ഇനി മുതൽ ഖത്തറും യുഎഇയും പരസ്പരം സഹകരിക്കും. ഏകീകൃത ഇലക്ട്രോണിക് സംവിധാനം ഉപയോഗിച്ചാകും ഇരു രാജ്യങ്ങൾക്കിടയിലുള്ള ഗതാഗത ലംഘനങ്ങൾ കണ്ടെത്തുക. ഗതാഗത ലംഘനങ്ങൾ പരസ്പരം അറിയിക്കാനുള്ള ഏകീകൃത സംവിധാനം, വിവരങ്ങളും ഡാറ്റകളും കൈമാറൽ എന്നിവ സംബന്ധിച്ച ഗൾഫ് സഹകരണ കൗൺസിലിന്റെ (ജിസിസി) ലക്ഷ്യങ്ങൾ കൈവരിക്കാനും ഗതാഗത സുരക്ഷ ശക്തിപ്പെടുത്താനുമുള്ള പരിശ്രമത്തിന്റെ ഭാഗമായാണ്

ഏകീകൃത ഇലക്ട്രോണിക് സംവിധാനം പ്രാബല്യത്തിൽ വന്നതോടെ ലംഘനം നടത്തുന്ന രാജ്യത്ത് തന്നെ വാഹന ഉടമ പിഴ അടക്കേണ്ടതില്ല. ഉദാഹരണത്തിന് ഖത്തർ റജിസ്‌ട്രേഷനിലുള്ള വാഹന ഉടമകൾ യുഎഇയിൽ ഗതാഗത നിയമങ്ങൾ ലംഘിച്ചാലും തിരികെ ഖത്തറിൽ എത്തുമ്പോൾ പിഴ അടച്ചാൽ മതിയാകും. ഇരു രാജ്യങ്ങളിലെയും സ്വദേശികൾക്കും പ്രവാസി താമസക്കാർക്കുമാണ് പുതിയ സംവിധാനത്തിന്റെ ഗുണം ലഭിക്കുക. അതേസമയം, ഒരു രാജ്യത്ത് വച്ച് നിയമ ലംഘനം നടത്തി അടുത്ത രാജ്യത്തേക്ക് കടന്നാലും പിഴയിൽ നിന്ന് ഒഴിവാകാനാകില്ല.

നിയമ ലംഘനമുണ്ടായാൽ ഉടമയുടെ മൊബൈൽ ഫോണിലേക്ക് ഉടൻ തന്നെ കൃത്യമായ സന്ദേശം എത്തുമെന്ന് ഗതാഗത വകുപ്പിലെ ട്രാഫിക് ബോധവൽക്കരണ വകുപ്പ് ഡയറക്ടർ ബ്രിഗേഡിയർ ഡോ. മുഹമ്മദ് റാദി അൽ ഹജിരി വ്യക്തമാക്കി. ഖത്തർ-യുഎഇ ഗതാഗത വകുപ്പുകളുടെ ഉന്നതതല സുരക്ഷാ യോഗത്തിലാണ് ഇതു സംബന്ധിച്ച് ധാരണയായത്.