കൊല്‍ക്കത്ത : ഗോകുലം കേരളക്ക് തകര്‍പ്പന്‍ ജയം. മറുപടിയില്ലാത്ത അഞ്ചുഗോളുകള്‍ക്കാണ് ഇന്ത്യന്‍ ആരോസിനെതിരെ ഗോകുലത്തിന്റെ വിജയം. വിജയത്തോടെ ഗോകുലം പോയിന്റ് ടേബിളില്‍ വീണ്ടും ഒന്നാമതെത്തി. ആദ്യ ഐ ലീഗ് മത്സരത്തിന് ബൂട്ടുകെട്ടിയ ശ്രീലങ്കന്‍ താരം വസീം റസീക് ആണ് ഗോകുലത്തിനായി പത്താം മിനിറ്റില്‍ ആദ്യ ഗോള്‍ നേടിയത്. തുടര്‍ന്ന് ശരീഫ് മുഹമ്മദും ലൂക്കയും ഗോകുലത്തിനായി ആദ്യപകുതിയില്‍ തന്നെ ലക്ഷ്യംകണ്ടു. രണ്ടാം പകുതിയില്‍ മലയാളി താരങ്ങളായ ജിതിന്‍ എം.എസ്ഉം സമാനും ഗോളുകള്‍ നേടി.

തുടക്കം മുതല്‍ അക്രമിച്ചുകളിച്ച ഗോകുലം കളിയുടെ ഒരു ഘട്ടത്തിലും ആരോസിന് അവസരങ്ങളൊന്നും നല്‍കിയില്ല. പത്താം മിനിറ്റില്‍ ലൂക്ക നല്‍കിയ അര്‍ധ അവസരം ഗോളിയെ കാഴ്ചക്കാരനാക്കി വസീം ഗോള്‍ ആക്കി മാറ്റുകയായിരുന്നു.തൊട്ടടുത്ത നിമിഷം എമില്‍ ബെന്നിക്ക് മികച്ച അവസരം കിട്ടിയെങ്കിലും ഗോളായില്ല.

28 ആം മിനിറ്റില്‍ ബോളുമായി കുതിച്ച ലൂക്കയെ ഫൗള്‍ ചെയ്തതിന് കിട്ടിയ പെനാല്‍റ്റി കിക്ക് ഷെരിഫ് മുഹമ്മദ് വലയിലേക്ക് തൊടുത്തെങ്കിലും ഗോളി തടഞ്ഞു. ഡിഫ്‌ലെക്ട ആയ പന്ത് രണ്ടാമതൊരു കിക്കില്‍ ഷെരീഫ് ലക്ഷ്യത്തിലെത്തിച്ചു .

32 ആം മിനിറ്റില്‍ ഗ്രൗണ്ടിന്റെ മിഡില്‍ നിന്നും വസീം നല്‍കിയ ലോങ്ങ് പാസ് രണ്ടു ആരോസ് താരങ്ങളെ മറികടന്നാണ് ലൂക്ക ഗോളാക്കി മാറ്റിയത്. 72 ആം മിനിറ്റില്‍ ലൂക്ക നല്‍കിയ പാസ്സ് മികച്ച ഒരു ടീം ഗെയിം ലൂടെ മലയാളി താരം ജിതിന്‍ തകര്‍പ്പനൊരു ഗോള്‍ ആക്കി മാറ്റി.

മത്സരത്തില്‍ തിരിച്ചുവരാന്‍ അവസരങ്ങളൊന്നും ഇല്ലാതിരുന്നിട്ടും അവസാന നിമിഷങ്ങളില്‍ മാത്രമാണ് ആരോസ് ചില അവസരങ്ങള്‍ പുറത്തെടുത്തത്. 81 ആം മിനിറ്റില്‍ ശ്രീകുട്ടന്റെ അസ്സിസ്റ്റില്‍ സമാന്‍ അഞ്ചാമത്തെ ഗോള്‍ കൂടെ നേടി പട്ടിക പൂര്‍ത്തിയാക്കുകയായിരുന്നു. ലീഗില്‍ അടുത്ത മത്സരത്തില്‍ 15 ന് ഗോകുലം സുദേവ എഫ് സി യെ നേരിടും.