കോഴിക്കോട്: കോവിഡ് ബാധിച്ച് മഥുരയിലെ കെ.വി.എം മെഡിക്കല്‍ കോളേജ് ആശുപത്രിയില്‍ ചികിത്സയില്‍ കഴിയുന്ന മാധ്യമ പ്രവര്‍ത്തകന്‍ സിദ്ദിഖ് കാപ്പന്റെ മോചനത്തിനായി മുഖ്യമന്ത്രി ഇടപെടണമെന്നാവശ്യം. ഉത്തര്‍ പ്രദേശിലെ ജയിലിലായിരുന്നു സിദ്ദീഖ് കാപ്പന്‍ കഴിഞ്ഞിരുന്നത്. യു.എ.പി.എ ചുമത്തി ജയിലിലടച്ച സിദ്ധീഖ് കാപ്പന്റെ ആരോഗ്യസ്ഥിതി മോശമായി വരികയാണ്.
നേരത്തെ തന്നെ ഹൃദ്രോഗിയും പ്രമേഹരോഗിയും ആണ് അദ്ദേഹം. കെ.യു.ഡബ്ല്യു.ജെ ഡല്‍ഹി ഘടകം സെക്രട്ടറി കൂടിയായിരുന്നിട്ടും അദ്ദേഹത്തിനു നീതി ലഭിക്കാന്‍ സര്‍ക്കാര്‍ ഇടപെട്ടില്ലെന്ന ആക്ഷേപം ശക്തമാണ്.

ഈ സാഹചര്യത്തില്‍ അദ്ദേഹത്തിന്റെ മോചനത്തിനും മതിയായ ചികിത്സ ലഭിക്കുന്നതിനുമായി മുഖ്യമന്ത്രി പിണറായി വിജയന്‍ ഇടപെടണമെന്നാണ് സിദ്ദീഖ് കാപ്പന്‍ ഐക്യദാര്‍ഢ്യ സമിതിയുടെയും കെ.യു.ഡബ്ല്യു.ജെയുടെയും ആവശ്യം. നീതി ലഭിച്ചില്ലെങ്കില്‍ സിദ്ദീഖ് കാപ്പന്റെ ഭാര്യയും കുടുംബവും ഐക്യദാര്‍ഢ്യസമിതിയും ഇക്കാര്യത്തില്‍ ശക്തമായ സമരത്തിനിറങ്ങാനാണ് ആലോചിക്കുന്നത്. വെള്ളിയാഴ്ച ഇതു സംബന്ധിച്ച് ഇവര്‍ മാധ്യമങ്ങളെ കാണുന്നുണ്ട്.