തൃശ്ശൂര്‍: ലോറിയില്‍ കൊണ്ട് പോയ കമ്പികള്‍ കുത്തിക്കയറി യുവാവ് മരിച്ചു. തൃശൂര്‍ ചെമ്പൂത്രയിലാണ് കമ്പി കയറ്റിയ ലോറിയില്‍ ബൈക്കിടിച്ച് അപകടമുണ്ടായത്. പുതുക്കോട് മണപ്പാടം സ്വദേശി ശ്രദേഷ് ( 21 ) ആണ് മരിച്ചത്. കഴുത്തിലും നെഞ്ചിലും കമ്പികള്‍ കുത്തി കയറിയാണ് മരണം.

കമ്പി കയറ്റിയ ലോറി പട്ടിക്കാട് ദേശീയപാത ആരംഭിക്കുന്ന ഭാഗത്ത് നിര്‍ത്തിയിട്ടിരിക്കുകയായിരുന്നു. ഇത് അറിയാതെയാണ് ബൈക്ക് യാത്രക്കാരന്‍ ലോറിക്ക് പുറകില്‍ ഇടിച്ച് കയറിയത്. ലോറിയില്‍ അപകട മുന്നറിയിപ്പ് ഇല്ലായിരുന്നുവെന്ന് പൊലീസ് പറഞ്ഞു. 

വാഹനത്തില്‍ ഇരുമ്പ് കമ്പികള്‍ പോലുള്ളവ കൊണ്ടുപോകുമ്പോള്‍ ഉണ്ടാകേണ്ട അപകട മുന്നറിയിപ്പ് സംവിധാനങ്ങളോ, വാഹനം നിര്‍ത്തിയിട്ടിരിക്കുകയാണെന്ന അപകട സൂചനയോ വാഹനത്തിലോ, പ്രദേശത്തോ ഉണ്ടായിരുന്നില്ല. ഇതാണ് അപകടത്തിന് വഴിയൊരുക്കിയതെന്ന് നാട്ടുകാര്‍ ആരോപിച്ചു. വാഹനത്തിന്റെ ടാര്‍പ്പായ പറന്നുപോയത് എടുക്കാനാണ് വാഹനം ദേശീയപാതയില്‍ നിര്‍ത്തിയതാണെന്നാണ് ഡ്രൈവര്‍ നല്‍കുന്ന വിശദീകരണം.