കണ്ണൂര്‍: കെ.റെയില്‍ പോലുള്ള പദ്ധതികള്‍ കേരളത്തിന് അനിവാര്യമെന്ന് സി.പി.എം ജനറല്‍ സെക്രട്ടറി സീതാറാം യെച്ചൂരി. അര്‍ധ അതിവേഗ റെയില്‍പ്പാത കേരളത്തിന്റെ വികസനത്തിന് ആവശ്യമായ പദ്ധതിയാണ്. കേരളത്തിലെ ജനങ്ങളുടെ ജീവിത നിലവാരം യൂറോപ്യന്‍ നിലവാരത്തിലായെന്നും എല്‍.ഡി.എഫ് സര്‍ക്കാരിന്റെ ഇത്തരം പദ്ധതികളാണ് കേരളത്തെ ഈ നിലയില്‍ എത്തിച്ചതെന്നും യെച്ചൂരി പറഞ്ഞു.

അതേസമയം ബുള്ളറ്റ് ട്രെയിനിനെ പാര്‍ട്ടി എതിര്‍ക്കുന്നതിനെ അദ്ദേഹം ന്യായീകരിച്ചു. ബുള്ളറ്റ് ട്രെയിനിന്റെയും കെ റെയിലിന്റെയും സാഹചര്യങ്ങള്‍ വ്യത്യസ്തമാണ്. മഹാരാഷ്ട്രയില്‍ ഭൂമി ഏറ്റെടുക്കുന്നതിനുള്ള പ്രശ്‌നങ്ങളുണ്ട്. നഷ്ടപരിഹാരം നല്‍കുന്ന സമീപനവും വ്യത്യസ്തമാണ്. കേരളത്തിലെ വികസന പ്രവര്‍ത്തനങ്ങള്‍ തുടരണമെന്നും യെച്ചൂരി പറഞ്ഞു.

കേന്ദ്രഭരണത്തില്‍ നിന്ന് ബി.ജെ.പിയെ തുടച്ചുനീക്കുക എന്ന ലക്ഷ്യത്തോടെ രാജ്യത്ത് ഇടത് ബദല്‍ ശക്തിപ്പെടുത്തുമെന്നും അദ്ദേഹം പറഞ്ഞു. ഹിജാബും മാംസം കഴിക്കുന്നതുമൊക്കെയാണ് ബിജെപിയ്ക്ക് പ്രശ്‌നം. തൊഴിലില്ലായ്മയും ദാരിദ്ര്യവുമൊന്നും അവര്‍ക്ക് പ്രശ്‌നമില്ല. ജനകീയ സമരങ്ങളെ അടിച്ചമര്‍ത്താന്‍ ഹിന്ദുത്വ ശക്തികളുടെ ശ്രമം നടക്കുകയാണ്. ഹിന്ദുത്വ ശക്തികള്‍ക്കെതിരേ ഇടത് ജനാധിപത്യ ബദല്‍ സാധ്യമാക്കാനാണ് ശ്രമം. അതിന് മതേതര സഖ്യങ്ങളുടെ പിന്തുണയുണ്ടാവണമെന്നും യെച്ചൂരി പറഞ്ഞു.

ജാതി സെന്‍സസിനോട് സി.പി.എമ്മിന് യോജിപ്പെന്നും യെച്ചൂരി വ്യക്തമാക്കി. നയ രൂപീകരണത്തില്‍ ജാതി സെന്‍സസ് പ്രധാനമാണ്. നിലവില്‍ കേന്ദ്ര സര്‍ക്കാരിന്റെ പക്കല്‍ പിന്നാക്ക വിഭാഗത്തെ സംബന്ധിക്കുന്ന കണക്കുകള്‍ ഇല്ലെന്നും യെച്ചൂരി പറഞ്ഞു.

കണ്ണൂരില്‍ നടത്തിയ വാര്‍ത്താ സമ്മേളനത്തില്‍ 23ാം പാര്‍ട്ടി കോണ്‍ഗ്രസിന്റെ തീരുമാനങ്ങള്‍ വിശദീകരിക്കുകയായിരുന്നു യെച്ചൂരി.
ദൃഢനിശ്ചയത്തിന്റെയും പ്രശ്‌ന പരിഹാരത്തിന്റെയും തീരുമാനങ്ങള്‍ എടുത്താണ് പാര്‍ട്ടി കോണ്‍ഗ്രസ് സമാപിച്ചതെന്ന് യെച്ചൂരി പറഞ്ഞു. പോളിറ്റ് ബ്യൂറോയില്‍ ദലിത് പ്രാതിനിധ്യം ഇല്ലെന്ന ആരോപണത്തിനും പരിഹാരമായി. അടിത്തട്ടുമുതല്‍ സി.പി.എമ്മിന്റെ പ്രവര്‍ത്തനം ശക്തമാക്കും. ഇതിലുടെ പാര്‍ട്ടിയുടെ ജനകീയ ശക്തി വര്‍ധിപ്പിക്കും. വടക്ക് കിഴക്കന്‍ മേഖലകളിലും ഹിന്ദി മേഖലകളിലും പാര്‍ട്ടി പ്രവര്‍ത്തനം ശക്തിപ്പെടുത്തും. വിലക്കയറ്റത്താലും ഇന്ധന വില വര്‍ധനയാലും രാജ്യത്ത് ജനജീവിതം ദുസ്സഹമായികൊണ്ടിരിക്കുകയാണെന്നും യെച്ചൂരി പറഞ്ഞു.