പാലക്കാട്: കൊവിഡ് നിയന്ത്രണങ്ങള്‍ കാറ്റില്‍പ്പറത്തി തത്തമംഗലത്ത് നടത്തിയ കുതിരയോട്ട മത്സരത്തില്‍ കൂടുതല്‍ നടപടിയുമായി പൊലിസ്. സംഭവത്തില്‍ 34 പേരെ പൊലിസ് അറസ്റ്റ് ചെയ്തു. തത്തമംഗലത്തെ അങ്ങാടി വേലയുമായി ബന്ധപ്പെട്ടായിരുന്നു പരിപാടി സംഘടിപ്പിച്ചത്. കാണാന്‍ ആയിരങ്ങളാണെത്തിയത്. പരിസരത്തെ വീടുകളുടെയും കെട്ടിടങ്ങളുടെയും മുകളില്‍ കാഴ്ചക്കാരായി നൂറുകണക്കിനുപേരും അണിനിരന്നിരുന്നു. സംഭവത്തില്‍ 47 കുതിരക്കാര്‍ക്കെതിരേയും സംഘാടകരായഅന്‍പതിലേറെ പേര്‍ക്കുമായിരുന്നു പൊലിസ് കേസെടുത്തിരുന്നത്. പരിപാടിയുടെ വീഡിയോ സമൂഹമാധ്യമങ്ങളില്‍ പ്രചരിച്ചതോടെയാണ് പൊലിസ് ഇടപെട്ട് പരിപാടി തടഞ്ഞത്.
മത്സരത്തിനിടെ വേഗത വര്‍ധിപ്പിക്കുന്നതിനിടെ നിയന്ത്രണം വിട്ട് കുതിര മറിഞ്ഞു വീഴുന്ന കാഴ്ചയുടെ വീഡിയോ വൈറലായിരുന്നു. ടാറിട്ട റോഡിലൂടെയുള്ള ഓട്ടത്തിലാണ് കുതിരക്ക് നിയന്ത്രണം തെറ്റുന്നത്. ഈ മിണ്ടാപ്രാണിയോട് കാണിക്കുന്ന ക്രൂരതയും വീഡിയോയില്‍ വ്യക്തമായിരുന്നു.