ഇരിട്ടി: പഴയ ബസ്റ്റാന്റില്‍ ബസും വിവാഹ പാര്‍ട്ടിയുമായി പോവുകയായിരുന്ന ടെമ്പോ വാനും കൂട്ടിയിടിച്ച് അഞ്ചു പേര്‍ക്ക് പരുക്ക്. കീഴ്പള്ളി സ്വദേശികളായ രാമകൃഷ്ണന്‍ മേലരികില്‍(54), വിജയമ്മ(52), മീനാക്ഷി(61), ടെമ്പോ വാന്‍ ഡ്രൈവര്‍ പ്രദീപന്‍ എന്നിവര്‍ക്കാണ് പരുക്കേറ്റത്. ഇതില്‍ നാലു പേരെ ഇരിട്ടിയിലെ സ്വകാര്യ ആശുപത്രിയിലും ഡ്രൈവര്‍ പ്രദീപനെ ഇരിട്ടി താലൂക്കാശുപത്രിയിലും പ്രവേശിപ്പിച്ചു.
ഇന്നലെ രാത്രി ഒമ്പതു മണിയോടെ ഇരിട്ടി പഴയ ബസ്‌സ്റ്റാന്റ് ട്രാഫിക് സര്‍ക്കിളിലായിരുന്നു അപകടം. കീഴ്പള്ളിയില്‍ നിന്നും പുതുപ്പള്ളിയിലേക്ക് പോകുകയായിരുന്ന വരനും മാതാപിതാക്കളും അടങ്ങുന്ന വിവാഹസംഘം സഞ്ചരിച്ച ടെമ്പോ വാനും  തലശ്ശേരിയില്‍ നിന്നും ഇരിട്ടിയിലേക്ക് വരികയായിരുന്ന ബാബ കല്ല്യാണി ബസുമാണ് കൂട്ടിയിടിച്ചത്. വണ്‍വെ ട്രാഫിക് തെറ്റിച്ച് ഇരിട്ടി സ്റ്റാന്റിലേക്ക് പോകാന്‍ ശ്രമിച്ച ബസില്‍ ടെമ്പോ വാന്‍ ഇടിക്കുകയായിരുന്നു. അപകടത്തില്‍ വാനിന്റെ മുന്‍വശം പാടേ തകര്‍ന്നു.