തളിപ്പറമ്പ്: വെള്ളാരം പാറയിലെ പൊലിസ് ഡംബിങ് യാര്‍ഡില്‍ വന്‍ തീപിടുത്തം. വാഹനങ്ങള്‍ കത്തി നശിക്കുന്നു. വിവിധ കേസുകളില്‍ ഉള്‍പ്പെട്ട് പിടികൂടിയ നൂറുക്കണക്കിന് വാഹനങ്ങളാണ് ഡംബിങ് യാര്‍ഡില്‍ ഉള്ളത്.

തീപിടുത്തത്തെ തുടര്‍ന്ന് തളിപ്പറമ്പ് ശ്രീകണ്ഠാപുരം റോഡില്‍ ഗതാഗത നിയന്ത്രണം ഏര്‍പ്പെടുത്തിയിരിക്കുകയാണ്. വാഹനങ്ങള്‍ ഒന്നും ഇതുവഴി കടത്തി വിടുന്നില്ല. തളിപ്പറമ്പ് അഗ്‌നിശമന നിലയത്തില്‍ നിന്നെത്തിയ മൂന്ന് യൂണിറ്റ് അഗ്‌നിശമന സേനാംഗങ്ങളും നാട്ടുകാരും പൊലിസും ചേര്‍ന്ന് തീ നിയന്ത്രണ വിധേയമാക്കാനുള്ള ശ്രമങ്ങള്‍ തുടരുകയാണ്. വാഹനങ്ങള്‍ക്ക് തീപിടിച്ചതോടെ പ്രദേശത്താകെ കറുത്ത പുക നിറഞ്ഞിരിക്കുകയാണ്. പയ്യന്നൂരില്‍ നിന്നും കണ്ണൂര് നിന്നും കൂടുതല്‍ അഗ്‌നിശമന യൂണിറ്റുകളെ സ്ഥലത്തേക്ക് വിളിച്ചിട്ടുണ്ട്. തളിപ്പറമ്പ് ഡിവൈ.എസ്.പിയുടെ നേതൃത്വത്തില്‍ പൊലിസ് സ്ഥലത്ത് എത്തിയിട്ടുണ്ട്. സമീപ പ്രദേശത്ത് ഏക്കറുകണക്കിന് സ്ഥലത്തേക്ക് തീ വ്യാപിച്ചിരുന്നു