അഗര്‍ത്തല: ത്രിപുര നിയമസഭ തെരഞ്ഞെടുപ്പില്‍ കനത്ത പോളിംഗ്. കനത്ത സുരക്ഷയാണ് വോട്ടെടുപ്പിനായി ഒരുക്കിയിരുന്നത്. ഇതുവരെ 81 ശതമാനത്തിലധികം പോളിങ് രേഖപ്പെടുത്തി. ത്രികോണ പോരാട്ടമാണ് നടന്നത്. അവസാന കണക്കുകള്‍ ഇത് ഉയര്‍ത്തിയേക്കും. ഭരണം നിലനിര്‍ത്താന്‍ ബി.ജെ.പി 55 സീറ്റുകളിലാണ് മത്സരിക്കുന്നത്. സി.പി.എം 47 സീറ്റുകളിലും, സഖ്യകക്ഷിയായ കോണ്‍ഗ്രസിന് 13 സീറ്റുകളിലും മത്സരിക്കുന്നുണ്ട്.
ജനവിധിയറിയാന്‍ ഇനി മാര്‍ച്ച് രണ്ടുവരേ കാത്തിരിക്കണം. അതേ സമയം വോട്ടെടുപ്പിനിടെ ചിലയിടങ്ങളിലും സംഘര്‍ഷമുണ്ടായി. മൂന്നു പേര്‍ക്ക് പരുക്കേറ്റു. ഒരു സി.പി.എം നേതാവിനും രണ്ട് പോളിങ് ഏജന്റുമാര്‍ക്കുമാണ് പരുക്കേറ്റത്. ശാന്തിര്‍ബസാര്‍, ധന്‍പൂര്‍, ഹൃഷ്യാമുഖ്,ബെലൂനിയ തുടങ്ങിയിടങ്ങളില്‍ ബി.ജെ.പി സി.പി.എം പ്രവര്‍ത്തകര്‍ ഏറ്റുമുട്ടി. 45 ഓളം ഇടങ്ങളില്‍ വോട്ടിങ് മെഷീന്‍ ക്രമക്കേടുകളും റിപ്പോര്‍ട്ട് ചെയ്തിട്ടുണ്ട്.

വോട്ട് ചെയ്യുന്നതില്‍ നിന്ന് ബി.ജെ.പി ജനങ്ങളെ തടഞ്ഞുവെന്നാണ് പ്രതിപക്ഷ നേതാവ് മണിക് സര്‍ക്കാര്‍ ആരോപിക്കുന്നത്. ടിപ്ര മോത്ത അദ്ധ്യക്ഷന്‍ പ്രദ്യോത് മാണിക്യ ദേബ് ബര്‍മയും ഭരണകക്ഷിയെ കുറ്റപ്പെടുത്തി. എന്നാല്‍ മുന്‍കാലങ്ങളെ അപേക്ഷിച്ച് അക്രമം കുറവായിരുന്നുവെന്ന് തെരഞ്ഞെടുപ്പ് കമ്മിഷന്‍ അവകാശപ്പെട്ടു.