ജിദ്ദ: സഊദി സന്ദര്‍ശിക്കാന്‍ ഖത്തര്‍ അമീര്‍ ശൈഖ് തമീം ബിന്‍ ഹമദ് അല്‍ഥാനിക്ക് സല്‍മാന്‍ രാജാവിന്റെ ക്ഷണം. രാജാവിന്റെ ക്ഷണക്കത്ത് സഊദി വിദേശ മന്ത്രി ഫൈസല്‍ ബിന്‍ ഫര്‍ഹാന്‍ രാജകുമാരന്‍ ഖത്തര്‍ അമീറിന് കൈമാറി. ഖത്തര്‍ അമീറുമായി വിദേശ മന്ത്രി നടത്തിയ കൂടിക്കാഴ്ചക്കിടെയാണ് രാജാവിന്റെ ക്ഷണക്കത്ത് കൈമാറിയത്. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധങ്ങള്‍ സര്‍വ മേഖലകളിലും കൂടുതല്‍ ശക്തമാക്കുന്നതിനെ കുറിച്ചും മേഖലയിലെയും ആഗോള തലത്തിലെയും പുതിയ സംഭവവികാസങ്ങളും പൊതുതാല്‍പര്യമുള്ള വിഷയങ്ങളും ഇരുവരും ചര്‍ച്ച ചെയ്തു. ദോഹ സഊദി എംബസി ചാര്‍ജ് ഡി അഫയേഴ്‌സ് അലി അല്‍ഖഹ്താനി, വിദേശ മന്ത്രിയുടെ ഓഫീസ് ഡയറക്ടര്‍ ജനറല്‍ അബ്ദുറഹ്മാന്‍ അല്‍ദാവൂദ് എന്നിവരും കൂടിക്കാഴ്ചയില്‍ സംബന്ധിച്ചു.