തൊടുപുഴ: വിവാഹം ഉറപ്പിച്ച യുവാവിന് മറ്റൊരു ബന്ധമുണ്ടെന്നറിഞ്ഞ് ബന്ധത്തില്‍ നിന്ന് പിന്‍മാറിയ പെണ്‍കുട്ടിയെ കൊല്ലാന്‍ ശ്രമം. ഇന്നലെ രാത്രിയില്‍ തൊടുപുഴയിലാണ് സംഭവം. പെണ്‍കുട്ടിയുടെ കഴുത്തില്‍ കത്തിവെച്ച് ഭീഷണിപ്പെടുത്തി മൊബൈല്‍തട്ടിപ്പറിച്ച് കടന്നുകളഞ്ഞ സംഭവത്തില്‍ പ്രതി ഫോര്‍ട്ട് കൊച്ചി സ്വദേശി ഷാജഹാന്‍ പിടിയില്‍. തൃപ്പൂണിത്തുറയില്‍ നിന്നാണ് ഇയാളെ പൊലിസ് പിടികൂടിയത്.
പ്രതിയും പെണ്‍കുട്ടിയും തമ്മിലുള്ള വിവാഹം ഉറപ്പിച്ചിരുന്നു. യുവാവിന് മറ്റൊരു പെണ്‍കുട്ടിയുമായി അടുപ്പം വന്നതോടെ പെണ്‍കുട്ടി ബന്ധത്തില്‍ നിന്ന് പിന്മാറുകയായിരുന്നു. ഇതിനിടെ വീണ്ടും വിവാഹാലോചനയുമായി ഷാജഹാന്‍ എത്തി. ഇത് നിഷേധിച്ചതോടെയാണ് കൊല്ലാന്‍ ശ്രമിച്ചത്.

തൊടുപുഴയിലെത്തി പെണ്‍കുട്ടിയെ ഭീഷണിപ്പെടുത്തി. സ്വകാര്യ ദൃശ്യങ്ങള്‍ കൈയ്യിലുണ്ടെന്നും പുറത്തുവിടുമെന്നും ഭീഷണിമുഴക്കി. രാത്രി നേരിട്ട് കണ്ട് സംസാരിച്ചിട്ടും വിവാഹാഭ്യര്‍ത്ഥന പെണ്‍കുട്ടി നിരസിച്ചതോടെ മറ്റാരോ ആയി ബന്ധമുണ്ടെന്ന് ആരോപിച്ച് മൊബൈല്‍ ഫോണ്‍ തട്ടിയെടുത്ത് കടന്നുകളഞ്ഞു. ഇതോടെയാണ് പൊലിസില്‍ പരാതി നല്‍കിയത്.