കൊച്ചി: നടിയെ ആക്രമിച്ച കേസിലെ തുടരന്വേഷണ വിവരങ്ങള്‍ മാധ്യമങ്ങള്‍ക്ക് ചോര്‍ത്തി നല്‍കിയെന്ന പരാതിയില്‍ എ.ഡി.ജി.പി ഇന്ന് വിചാരണക്കോടതിയില്‍ റിപ്പോര്‍ട്ട് നല്‍കും. അന്വേഷണ ഉദ്യോഗസ്ഥനായ ബൈജു പൗലോസിന്റെ വിശദീകരണത്തില്‍ തൃപ്തിയാവാതെയാണ് കോടതി എ.ഡി.ജി.പിയോട് റിപ്പോര്‍ട്ട് തേടിയത്. കേസില്‍ സൈബര്‍ വിദഗ്ധന്‍ സായ് ശങ്കറിനെ ഇന്ന് ഉച്ചയ്ക്ക് ചോദ്യം ചെയ്യും.

തുടരന്വേഷണം ഏപ്രില്‍ 15 നകം പൂര്‍ത്തിയാക്കാനായിരുന്നു കോടതി നിര്‍ദ്ദേശം. അന്വേഷണത്തിന് മൂന്ന് മാസം കൂടി സാവകാശം ആവശ്യപ്പെട്ടുള്ള ക്രൈംബ്രാഞ്ച് ഹരജി ഹൈക്കോടതിയുടെ പരിഗണനയിലാണ്. ഇക്കാര്യം ഇന്ന് വിചാരണകോടതിയെ അറിയിക്കും.

ഇതിനിടെ, കേസില്‍ പ്രതിയായ നടന്‍ ദിലീപ് ശബരിമല ദര്‍ശനം നടത്തി. തിങ്കളാഴ്ച്ച രാവിലെ ഏഴ് മണിയോടെ സുഹൃത്ത് ശരത്ത്, മാനേജന്‍ വെങ്കി എന്നിവര്‍ക്കൊപ്പമാണ് ദിലീപ് ശബരിമലയില്‍ എത്തിയത്. വഴിപാടുകളും നടത്തി. ഇന്നലെ രാത്രി സന്നിധാനത്ത് തങ്ങിയാണ് ദിലീപ് ദര്‍ശനം നടത്തിയത്.

ദിലീപിന്റെ ജാമ്യം റദ്ദാക്കാന്‍ പ്രോസിക്യൂഷന്‍ നല്‍കിയ അപേക്ഷയും കോടതിയുടെ പരിഗണനയിലുണ്ട്. ഇതും അടുത്തദിവസം പരിഗണിച്ചേക്കും. ദിലീപ് ജാമ്യവ്യവസ്ഥകള്‍ ലംഘിച്ച് സാക്ഷികളെ സ്വാധീനിക്കാന്‍ ശ്രമിച്ചെന്നാണ് പ്രോസിക്യൂഷന്‍ ആരോപണം.