ദോഹ: ദോഹയിലെ ജാസിം ബിന്‍ ഹമദ് സ്‌റ്റേഡിയത്തില്‍ നടക്കുന്ന ലാകകപ്പ് യോഗ്യത മത്സരത്തിനുള്ള ഖത്തര്‍ ടീമിനെ പ്രഖ്യാപിച്ചു. വ്യാഴാഴ്ച രാത്രിയാണ് യോഗ്യതാ മത്സരം നടക്കുക. 
 കോച്ച് മാര്‍ക്വേസ് ലോപസ് ആണ് 25 അംഗ ടീമിനെ തെരഞ്ഞെടുത്തത്. ജനുവരി-ഫെബ്രുവരി മാസങ്ങളിലായി നടന്ന ഏഷ്യന്‍ കപ്പ് ഫുട്‌ബോളില്‍ കിരീടമണിഞ്ഞ ശേഷം ആദ്യമത്സരത്തിനാണ് ഖത്തര്‍ ബൂട്ടുകെട്ടുന്നത്. 

കൂടുതല്‍ പുതുമുഖങ്ങള്‍ക്ക് അവസരം നല്‍കിയാണ് 2026 ലോകകപ്പ്, 2027 ഏഷ്യന്‍ കപ്പ് യോഗ്യത റൗണ്ടിലെ തങ്ങളുടെ മൂന്നാം അങ്കത്തിന് ഖത്തര്‍ ടീമിനെ ഇറക്കുന്നത്. ഗോള്‍കീപ്പര്‍ സാദ് അല്‍ ഷീബിനെ ഒഴിവാക്കി. ഏഷ്യന്‍ കപ്പിലെ സൂപ്പര്‍ ഗോളി മിഷാല്‍ ബര്‍ഷിംനെയാണ് ഉള്‍പ്പെടുത്തിയത്.

അല്‍ റയ്യാന്റെ അഹ്‌മദ് അല്‍ റവി, അല്‍ വക്‌റ ഗോള്‍ കീപ്പര്‍ സൗദ് അല്‍ ഖാതിര്‍ എന്നിവരെ ടീമില്‍ ഉള്‍പ്പെടുത്തി. അക്രം അഫീഫ്, അല്‍ മുഈസ് അലി തുടങ്ങിയ താരങ്ങളും ടീമില്‍ തിരികെയെത്തിയിട്ടുണ്ട്.