കൊച്ചി: ഇന്ത്യൻ സൂപ്പർ ലീഗിൽ കേരള ബ്ലാസ്റ്റേഴ്സിനു ഇന്ന് ആശ്വാസ മത്സരം. പ്ലേഓഫ് ഉറപ്പിച്ച കേരള ബ്ലാസ്റ്റേഴ്സ് ലീഗ് റൗണ്ടിലെ അവസാന കളിക്കാണ് ഇന്ന് ബൂട്ടുകെട്ടുന്നത്. സ്വന്തം തട്ടകമായ കൊച്ചി ജവഹർലാൽ നെഹ്റു സ്റ്റേഡിയത്തിൽ നിലവിലെ ജേതാക്കളായ ഹൈദരാബാദ് എഫ്.സിയെ നേരിടും. ഹൈദരാബാദ് രണ്ടാം സ്ഥാനവുമായി നേരത്തേ സെമിഫൈനലിൽ ഇടമുറപ്പിച്ചിട്ടുണ്ട്. ബ്ലാസ്റ്റേഴ്‌സ് നിലവിൽ അഞ്ചാം സ്ഥാനത്താണ്

ജയിച്ചാൽ ബ്ലാസ്റ്റേഴ്സിന് എ.ടി.കെ മോഹൻ ബഗാനും ബംഗളൂരു എഫ്.സിക്കുമൊപ്പം 34 പോയന്റാവും. എന്നാൽ, നിലവിൽ ഗോൾ ശരാശരിയിൽ ബ്ലാസ്റ്റേഴ്‌സ് ഇരുടീമുകൾക്കും പിന്നിലാണ്. എ.ടി.കെയുടെ ഗോൾ ശരാശരി +7ഉം ബംഗളൂരുവിന്റേത് +4ഉം ആണ്. ബ്ലാസ്റ്റേഴ്സിന്റേതാവട്ടെ +1ഉം ആണ്. അതിനാൽ ബ്ലാസ്റ്റേഴ്സ് മികച്ച ജയത്തിലൂടെ മൂന്നോ നാലോ സ്ഥാനത്തെത്താനായിരിക്കും ശ്രമിക്കുക.

മൂന്നോ നാലോ സ്ഥാനം നേടിയാൽ സ്വന്തം മൈതാനത്ത് പ്ലേഓഫ് കളിക്കാം എന്ന ആനുകൂല്യമുണ്ട്. മൂന്നും ആറും സ്ഥാനക്കാർ തമ്മിലും നാലും അഞ്ചും സ്ഥാനക്കാർ തമ്മിലുമാണ് ഏക പാദ പ്ലേഓഫ് മത്സരങ്ങൾ നടക്കുക.