ചെന്നൈ: തമിഴ്‌നാട് നിയമസഭാ തെരഞ്ഞെടുപ്പിന്റെ ആദ്യഘട്ട വോട്ടെണ്ണല്‍ അവസാനിക്കുമ്പോള്‍ ഇഞ്ചോടിഞ്ച് പോരാട്ടം.
വോട്ടെണ്ണലിന്റെ ആദ്യഘട്ടത്തില്‍ യു.പി.എ വ്യക്തമായി ലീഡ് ചെയ്തിരുന്നു. എന്നാല്‍ ആദ്യഘട്ട വോട്ടെണ്ണല്‍ അവസാനിക്കുമ്പോള്‍ എന്‍.ഡി.എയും ലീഡ് നില മെച്ചപ്പെടുത്തുന്ന കാഴ്ചയാണുള്ളത്. 111 സീറ്റുകളില്‍ ഡി.എം.കെ നേതൃത്വം നല്‍കുന്ന യു.പി.എ മുന്നിട്ടുനില്‍ക്കുമ്പോള്‍ തൊട്ടുപിന്നില്‍ എ.ഐ.എ.ഡി.എം.കെ നേതൃത്വത്തിലുള്ള എന്‍.ഡി.എ 95 സീറ്റുളില്‍ ലീഡ് ചെയ്യുകയാണ്.
അതേസമയം ഇവിടെ വമ്പന്‍മാര്‍ക്ക് കാലിടറുന്ന കാഴ്ചയും ആദ്യഘട്ടം പിന്നിടുമ്പോള്‍ കാണാം. അമ്മ മക്കള്‍ മുന്നേറ്റ കഴകം (എഎംഎംകെ) ജനറല്‍ സെക്രട്ടറി ടിടിവി ദിനകരന്‍ 400 വോട്ടുകള്‍ക്കാണ് പിന്നില്‍ നില്‍ക്കുന്നത്. തൗസന്റ് ലൈറ്റ്‌സ് നിയമസഭാ മണ്ഡലത്തില്‍ ബി.ജെ.പി സ്ഥാനാര്‍ഥിയും ചലച്ചിത്ര നടിയുമായ ഖുശ്ബു സുന്ദറും പിന്നിലാണ്. കോയമ്പത്തൂര്‍ സൗത്തില്‍ മുന്നിട്ടുനിന്നിരുന്ന മക്കള്‍നീതിമയ്യം നേതാവ് രണ്ടാംഘട്ട വോട്ടെണ്ണല്‍ നടക്കുമ്പോള്‍ പിന്നിലായിരിക്കുകയാണ്. ഇവിടെ കോണ്‍ഗ്രസിന്റെ മയൂര്‍ ജയകുമാറാണ് മുന്നിട്ടുനില്‍ക്കുന്നത്. കട്പാടി മണ്ഡലത്തില്‍ ഡി.എം.കെ ജനറല്‍ സെക്രട്ടറി ദുരൈമുരുകനും പിന്നിലാണ്.