ആലപ്പുഴ
എ.ഐ.എസ്.എഫ് സംസ്ഥാന പ്രസിഡന്റായി ആർ.എസ് രാഹുൽരാജിനെയും സെക്രട്ടറിയായി പി. കബീറിനെയും തെരഞ്ഞെടുത്തു. ഇന്നലെ ആലപ്പുഴയിൽ സമാപിച്ച സംസ്ഥാന സമ്മേളനത്തിലാണ് പുതിയ ഭാരവാഹികളെ തെരഞ്ഞെടുത്തത്. നന്ദു ജോസഫ്, എ. ഷിനാഫ്, കണ്ണൻ എസ്. ലാൽ, ടി.ടി മീനൂട്ടി, നാദിറ മെഹ്റിൻ (വൈസ് പ്രസിഡന്റുമാർ), എ. ആധിൻ, സി.കെ ബിജിത്ത് ലാൽ, ബിപിൻ എബ്രഹാം, ശ്രേയ രതീഷ്, അസ് ലംഷാ (ജോയിന്റ് സെക്രട്ടറിമാർ). എന്നിവരാണ് മറ്റു ഭാരവാഹികൾ. ഉന്നത വിദ്യാഭ്യാസ മേഖലയിലെ സ്വകാര്യ നിക്ഷേപങ്ങള്‍ അവസാനിപ്പിക്കണമെന്ന് സംസ്ഥാന സമ്മേളനം പ്രമേയത്തിലൂടെ ആവശ്യപ്പെട്ടു. കേരളത്തിലെ സർവകലാശാലയിൽ ഓരോ കോഴ്സുകൾക്കും പലവിധത്തിലുള്ള ഫീസുകളാണ് നിലവിൽ ഈടാക്കുന്നത്. ഇതു സാമൂഹ്യനീതിക്ക് എതിരാണ്. സര്‍വകലാശാലയിലെ ഫീസ് നിരക്ക് ഏകീകരിക്കണമെന്നും സമ്മേളനം പ്രമേയത്തിലൂടെ ആവശ്യപ്പെട്ടു.