അഹ്മദാബാദ്: ഗുജറാത്തില്‍ ഭൂചലനം. റിക്ടര്‍ സ്‌കെയിലില്‍ 4.3 തീവ്രത രേഖപ്പെടുത്തിയ ഭൂചലനം ഉണ്ടായതായി നാഷണല്‍ സെന്റര്‍ ഫോര്‍ സീസ്‌മോളജി അറിയിച്ചു. ഞായറാഴ്ച ഉച്ച കഴിഞ്ഞ് 3.21 ഭൂചലനം ഉണ്ടായത്. രാജ്‌കോട്ടില്‍ നിന്ന് 270 കിലോമീറ്റര്‍ അകലെയാണ് (എന്‍എന്‍ഡബ്ല്യു) ഭൂകമ്പത്തിന്റെ പ്രഭവകേന്ദ്രമെന്ന് എന്‍സിഎസ് ട്വീറ്റ് ചെയ്തു. ഇതുവരെ ആളപായമൊന്നും റിപ്പോര്‍ട്ട് ചെയ്തിട്ടില്ല.

പാകിസ്താനിലെ ഹൈദബാദിലും ഭൂചലനത്തെ തുടര്‍ന്ന് പ്രകമ്പനമുണ്ടായി. ഭൗമോപരിതലത്തില്‍ നിന്ന് 10 കി.മി താഴ്ചയിലാണ് ഭൂചലനമുണ്ടായത്. നാശനഷ്ടമോ ആളപായമോ റിപ്പോര്‍ട്ട് ചെയ്യപ്പെട്ടിട്ടില്ല.കഴിഞ്ഞ ആഴ്ചയും മൂന്നു ചെറു ഭൂചലനങ്ങള്‍ ഗുജറാത്തില്‍ റിപ്പോര്‍ട്ട് ചെയ്തിരുന്നു. അംറേലി ജില്ലയില്‍ രണ്ടു ദിവസം മുന്‍പായിരുന്നു ഭൂചലനങ്ങള്‍. ശക്തികുറഞ്ഞ ഭൂചലനങ്ങളാണ് ഇവിടെ റിപ്പോര്‍ട്ട് ചെയ്യപ്പെട്ടിരുന്നത്.

ഇന്നുണ്ടായ ഭൂചലന പ്രഭവ കേന്ദ്രം രാജ്‌കോട്ടില്‍ നിന്ന് വടക്കു വടക്കുപടിഞ്ഞാറ് 270 കി.മി അകലെയാണ്. കഴിഞ്ഞ രണ്ടു വര്‍ഷത്തിനിടെ ഗുജറാത്തിലെ അംറേലിയില്‍ 400 ചെറു ഭൂചലനങ്ങളുണ്ടായെന്നാണ് കണക്ക്. ദിവസങ്ങളോളം നീണ്ടുനില്‍ക്കുന്ന ചെറു പ്രകമ്പനങ്ങളാണിത്.