റോഹിങ്ക്യന്‍ മുസ്‌ലിങ്ങള്‍ക്കെതിരെയായ അതിക്രമണങ്ങള്‍ തുടര്‍ന്ന് മ്യാന്മര്‍ സൈന്യം. പട്ടാളത്തിന്റെ അതിക്രമണങ്ങളെ തുടര്‍ന്ന് ഭവനരഹിതരായി ക്യാമ്പുകളില്‍ ദുരിത ജീവിതം നയിക്കുന്ന റോഹിങ്ക്യന്‍ മുസ്‌ലിം യുവാക്കളെ സൈന്യം ബലം പ്രയോഗിച്ച അപകടമേറിയ യുദ്ധമേഖലകളിലേക്ക് നിര്‍ബന്ധിത സൈനിക സേവനത്തിന് അയ്ക്കുന്നതായി റിപ്പോര്‍ട്ട്. ഹ്യൂമന്‍ റൈറ്റ്‌സ് വാച്ച് അടക്കമുള്ള മനുഷ്യാവകാശസംഘടനകള്‍ വാര്‍ത്ത റിപ്പോര്‍ട്ട് ചെയ്തിട്ടുണ്ട്.

റാഖൈന്‍ മേഖലയില്‍ സൈന്യവുമായി ആഭ്യന്തര യുദ്ധത്തില്‍ ഏര്‍പ്പെട്ടിരിക്കുന്ന അരക്കന്‍ കലാപകാരികള്‍ക്കെതിരായ പോരാട്ടങ്ങള്‍ക്കായാണ് റോഹിങ്ക്യകളെ വ്യാപകമായി സൈന്യത്തില്‍ ചേര്‍ക്കുന്നത്.നിരവധി റോഹിങ്ക്യകള്‍ അരക്കന്‍ കലാപകാരികളുമായുള്ള പോരാട്ടത്തിനിടയിലും വ്യോമാക്രമണങ്ങളിലും കൊല്ലപ്പെട്ടെന്നാണ് യുദ്ധമേഖലയിലെ റോഹിങ്ക്യകളെ ഉദ്ധരിച്ച് വിവിധ വാര്‍ത്താ മാധ്യമങ്ങള്‍ റിപ്പോര്‍ട്ട് ചെയ്യുന്നത്. ഈ വര്‍ഷം ഇതുവരെ നൂറ് റോഹിങ്ക്യകളെങ്കിലും യുദ്ധത്തില്‍ കൊല്ലപ്പെട്ടെന്നാണ് ബി.ബി.സി റിപ്പോര്‍ട്ട് ചെയ്യുന്നത്.

കഴിഞ്ഞ ഫെബ്രുവരിയിലാണ് ക്യാമ്പുകളില്‍ ദുരിതത്തില്‍ കഴിഞ്ഞിരുന്ന റോഹിങ്ക്യകളെ ഭക്ഷണവും പാര്‍പ്പിടവും പൗരത്വവും വാഗ്ദാനം ചെയ്ത് സൈന്യം സമീപിച്ചത്. എന്നാല്‍ റിക്രൂട്ട് ചെയ്യപ്പെട്ടവര്‍ക്ക് നല്‍കിയ വാഗ്ധാനങ്ങള്‍ പാലിക്കാത്ത സൈന്യം, കൂടുതല്‍ യുവാക്കളെയും പുരുഷന്‍മാരെയും ഭീഷണിയിലൂടെയും ബലപ്രയോഗത്തിലൂടെയും സൈന്യത്തില്‍ ചേര്‍ക്കുന്ന നടപടിയാണ് ഇപ്പോള്‍ കൈക്കൊള്ളുന്നത്.
അരാക്കന്‍ കലാപകാരികളുമായ മ്യാന്മര്‍ സൈന്യത്തിന്റെ സംഘര്‍ഷത്തെ തുടര്‍ന്ന് അന്താരാഷ്ട്ര സഹായങ്ങള്‍ നിലച്ച ക്യാമ്പുകളിലെ ദുരിതം തങ്ങളുടെ നേട്ടങ്ങള്‍ക്കായി മ്യാന്മര്‍ സൈന്യം ഉപയോഗിക്കുകയാണെന്നാണ് വിവിധ മനുഷ്യാവകാശ സംഘടനകള്‍ ചൂണ്ടിക്കാട്ടുന്നത്.