കോട്ടയം: നിയമസഭയില്‍ അരനൂറ്റാണ്ട് പിന്നിട്ട ഉമ്മന്‍ ചാണ്ടിക്ക് 12ാം പോരാട്ടത്തില്‍ പുതുപ്പള്ളിയില്‍ വീണ്ടും ജയം. 8,227 വോട്ടിന്റെ ഭൂരിപക്ഷത്തിനാണ് ജെയ്ക് സി. തോമസിനെ (എല്‍.ഡി.എഫ്) തോല്‍പ്പിച്ചത്.

2016ലെ 29,092ന്റെ ഭൂരിപക്ഷം ഗണ്യമായി കുറഞ്ഞു. ശക്തമായ പോരാട്ടമാണ് ജെയ്ക് ഉയര്‍ത്തിയത്. മണര്‍ക്കാട്, പാമ്പാടി പഞ്ചായത്തുകളില്‍ ജെയ്ക് മുന്നില്‍ എത്തുകയും ചെയ്തു. യാക്കോബായ വിഭാഗത്തിന്റെയും കേരള കോണ്‍ഗ്രസി (എം)ന്റെയും വോട്ടുകള്‍ നഷ്ടമായതാണ് ഉമ്മന്‍ ചാണ്ടിയുടെ ഭൂരിപക്ഷം കുറച്ചത്.
1970ല്‍ സി.പി.എമ്മിലെ ഇ.എം ജോര്‍ജിനെ തോല്‍പ്പിച്ച് 27ാം വയസിലാണ് പുതുപ്പള്ളിയില്‍ ഉമ്മന്‍ ചാണ്ടി വിജയത്തിന് തുടക്കം കുറിച്ചത്. പിന്നീടിങ്ങോട്ട് എല്ലാതെരഞ്ഞെടുപ്പിലും കുഞ്ഞൂഞ്ഞും പുതുപ്പള്ളിയും പരസ്പരം കൈകോര്‍ത്ത് പിടിച്ചു. ഇത്തവണയും ഭൂരിപക്ഷം കുറഞ്ഞിട്ടും ഉമ്മന്‍ ചാണ്ടിയെ തന്നെ പുതുപ്പള്ളി നായകനായി തെരഞ്ഞെടുത്തു.