ന്യൂഡല്‍ഹി: നിയമസഭ തെരഞ്ഞെടുപ്പ് നടന്ന മേഘാലയയില്‍ വോട്ടെണ്ണല്‍ പുരോഗമിക്കേ എന്‍.പി.പി- തൃണമൂല്‍ ഇഞ്ചോടിഞ്ച് പോരാട്ടം. ഏതാണ്ട് ഒരേ സീറ്റുകളിലാണ് ഇരു പാര്‍ട്ടികളും മുന്നേറുന്നത്.

ത്രിപുര, മേഘാലയ, നാഗാലന്‍ഡ് എന്നീ വടക്കുകിഴക്കന്‍ സംസ്ഥാനങ്ങളിലാണ് നിയമസഭാ തെരഞ്ഞെടുപ്പ് നടന്നത്. ബദ്ധവൈരികള്‍ കൈകോര്‍ത്ത ത്രിപുരയിലും നാഗാലാന്‍ഡിലും ബി.ജെ.പി മുന്നേറ്റമാണ് ആദ്യ ഫലസൂചനകള്‍ കാണിക്കുന്നത്.

വോട്ടെണ്ണലിന്റെ ഭാഗമായി കനത്ത സുരക്ഷയാണ് മൂന്നു സംസ്ഥാനങ്ങളിലും ഏര്‍പ്പെടുത്തിയിരിക്കുന്നത്. ത്രിപുരയില്‍ രണ്ടാം സ്ഥാനത്ത് തിപ്രമോദയാണ്. മൂന്നാം സ്ഥാനത്താണ് ഇടത്-കോണ്‍ഗ്രസ് സഖ്യം ഇപ്പോള്‍ നില്‍ക്കുന്നത്.

മൂന്ന് സംസ്ഥാനങ്ങളിലായി 178 സീറ്റുകളിലേക്കാണ് ഫെബ്രുവരി 16, 27 തീയതികളില്‍ വോട്ടെടുപ്പ് നടന്നത്. ഇടത് കോട്ട തകര്‍ത്ത് കഴിഞ്ഞ തവണ ബി.ജെ.പി അധികാരം പിടിച്ചെടുത്ത ത്രിപുര ഫലമാണ് ദേശീയതലത്തില്‍ ഉറ്റുനോക്കുന്നത്. 60 അംഗ നിയമസഭയിലേക്കുള്ള തെരഞ്ഞെടുപ്പില്‍ ബി.ജെ.പിയെ വെല്ലുവിളിക്കാന്‍ പരമ്പരാഗത എതിരാളികളായ കോണ്‍ഗ്രസും ഇടതുപക്ഷവും ആദ്യമായി കൈകോര്‍ത്തതും നിര്‍ണായകമാണ്.