കോട്ടയം: ഇടതു സ്ഥാനാര്‍ഥിക്ക് വേണ്ടി പ്രചാരണത്തിന് ഇറങ്ങാന്‍ തൊഴിലുറപ്പ് തൊഴിലാളികള്‍ക്ക് മേറ്റിന്റെ നിര്‍ദ്ദേശം. കോട്ടയം വിജയപുരത്താണ് സംഭവം. ജോലിക്ക് വന്നതായി രേഖപ്പെടുത്തിയ ശേഷം സ്വീകരണത്തിന് പോകാനാണ് മേറ്റ് നിര്‍ദേശം നല്‍കിയത്. വാട്‌സ്അപ്പ് ഗ്രൂപ്പില്‍ തൊഴിലാളികള്‍ക്ക് നിര്‍ദ്ദേശം നല്‍കുന്ന ശബ്ദസന്ദേശം പുറത്തുവന്നു. 

ഒമ്പതാം വാര്‍ഡിലെ തൊഴിലുറപ്പ് മേറ്റ് ജ്യോതിയാണ് വാട്‌സാപ്പ് ഗ്രൂപ്പില്‍ ശബ്ദ സന്ദേശം പങ്കുവച്ചത്. തൊഴിലുറപ്പിന് അറ്റന്‍ഡന്‍സ് രേഖപ്പെടുത്തിയ ശേഷം തോമസ് ചാഴികാടന്റെ പ്രചാരണത്തിന് പോകണമെന്നായിരുന്നു നിര്‍ദേശം. സംഗതി ഗ്രൂപ്പില്‍ നിന്ന് ചോര്‍ന്നതോടെ പഞ്ചായത്ത് ഭരിക്കുന്ന കോണ്‍ഗ്രസ് ഭരണ സമിതി പരാതിയുന്നയിക്കുകയായിരുന്നു. മെമ്പര്‍ പറഞ്ഞത് അനുസരിച്ചാണ് സന്ദേശം അയച്ചതെന്നാണ് മേറ്റിന്റെ  വിശദീകരണം. സംഭവത്തില്‍ യുഡിഎഫ് പരാതി ഉന്നയിച്ചതോടെ തൊഴിലാളികള്‍ സ്വീകരണം ഉപേക്ഷിച്ച് പണിക്ക് കയറി.