ന്യൂഡല്‍ഹി: കൊവിഡ് വ്യാപനത്തെത്തുടര്‍ന്ന് ലോക്ക്ഡൗണ്‍ നിലനില്‍ക്കുന്നതിനാല്‍ സാമ്പത്തിക പ്രതിസന്ധി നേരിടുന്ന ഓട്ടോ-ടാക്‌സി തൊഴിലാളികള്‍ക്ക് 5,000 രൂപയുടെ ധന സഹായം പ്രഖ്യാപിച്ച് ഡല്‍ഹിയിലെ അരവിന്ദ് കെജ്‌രിവാള്‍ സര്‍ക്കാര്‍.

 എല്ലാ റേഷന്‍ കാര്‍ഡ് ഉടമകള്‍ക്കും സൗജന്യ റേഷനും സര്‍ക്കാര്‍ പ്രഖ്യാപിച്ചു. കൊവിഡ് പ്രതിരോധം മെച്ചപ്പെടുമെന്നാണ് പ്രതീക്ഷിക്കുന്നത്. 

72 ലക്ഷം വരുന്ന കാര്‍ഡ് ഉടമകള്‍ക്ക് രണ്ടുമാസത്തേക്ക് സൗജന്യ റേഷന്‍ നല്‍കുമെന്നും അതിനര്‍ഥം നിലവിലെ ലോക്ക്ഡൗണ്‍ രണ്ടുമാസംവരെ നീണ്ടുനില്‍ക്കും എന്നല്ലെന്നും കെജ്‌രിവാള്‍ പറഞ്ഞു.

രോഗവ്യാപനത്തെത്തുടര്‍ന്ന് കഴിഞ്ഞമാസമാണ് ഒരാഴ്ചത്തേക്ക് ഡല്‍ഹിയില്‍ ലോക്ക്ഡൗണ്‍ പ്രഖ്യാപിച്ചത്. കേസുകള്‍ കുറയാത്തതിനെത്തുടര്‍ന്ന് അത് ഈ മാസം പത്തുവരെ നീട്ടുകയായിരുന്നു. 

കഴിഞ്ഞവര്‍ഷം ലോക്ഡൗണ്‍ സമയത്തും സംസ്ഥാനത്തെ ഒന്നരലക്ഷത്തോളം വരുന്ന ഓട്ടോ, ടാക്‌സി ഡ്രൈവര്‍മാര്‍ക്ക് 5,000 രൂപ വീതം കെജ്‌രിവാള്‍ ധനസഹായം നല്‍കിയിരുന്നു.