തൊടുപുഴ: പറഞ്ഞത് വെറും വാക്കല്ലെന്ന് ഉടുമ്പന്‍ചോലയിലെ യു.ഡി.എഫ് സ്ഥാനാര്‍ഥി അഡ്വ. ഇ.എം ആഗസ്തി തെളിയിച്ചു. അട്ടിമറി വിജയം പ്രതീക്ഷിച്ചിടത്ത് വമ്പന്‍ പരാജയം നേരിട്ടതിന് പിന്നാലെയാണ് വാക്ക് പാലിക്കാന്‍ തല മൊട്ടയടിച്ചത്. ആഗസ്തി തന്നെയാണ് ഫെയ്‌സ് ബുക്ക് പോസ്റ്റ് വഴി മൊട്ടയടിച്ച വിവരം പങ്കുവച്ചത്. വാക്കുകള്‍ പാലിക്കാനുള്ളതാണെന്ന കുറിപ്പോടെയാണ് വേളാങ്കണ്ണി പള്ളിക്ക് മുന്നില്‍ നില്‍ക്കുന്ന ചിത്രം പങ്കുവച്ചിരിക്കുന്നത്.

ഒരു സ്വകാര്യ ചാനല്‍ സര്‍വേയില്‍ എം.എം മണിക്ക് മണ്ഡലത്തില്‍ 20,000 ല്‍ അധികം വോട്ടിന്റെ വലിയ ഭൂരിപക്ഷം ലഭിക്കുമെന്ന് പറഞ്ഞിരുന്നു. ഇതിന് പിന്നാലെയാണ് ഉടുമ്പന്‍ചോലയില്‍ താന്‍ പരാജയപ്പെട്ടാല്‍ തല മൊട്ടയടിക്കുമെന്ന് ആഗസ്തി പ്രഖ്യാപിച്ചത്. തെരഞ്ഞെടുപ്പ് ഫലം വന്നതിന് പിന്നാലെ ആഗസ്തി എപ്പോള്‍ മൊട്ടയടിക്കുമെന്ന ചോദ്യം സോഷ്യല്‍ മീഡിയയില്‍ അടക്കം സജീവമാകുകയും ചെയ്തു. 

ഉടന്‍ മൊട്ടയടിക്കുമെന്ന് ആഗസ്തി പറഞ്ഞെങ്കിലും തെരഞ്ഞെടുപ്പില്‍ തോല്‍വിയും ജയവും സാധാരണയാണെന്നും ആഗസ്തി തീരുമാനത്തില്‍ നിന്നും പിന്മാറണമെന്നും എം.എം.മണി ആവശ്യപ്പെട്ടിരുന്നു. ഉടുമ്പന്‍ചോലയില്‍ നിന്നുള്‍പ്പെടെ മൂന്നുവട്ടം എം.എല്‍.എ ആയിട്ടുണ്ട് ഇ.എം. ആഗസ്തി. 2016ല്‍ 1109 വോട്ടിന്റെ  ഭൂരിപക്ഷത്തില്‍ കടന്നുകൂടിയ എം.എം മണി ഇത്തവണ 38305 വോട്ടിന്റെ വലിയ ഭൂരിപക്ഷമാണ് നേടിയത്.