ന്യൂഡല്‍ഹി: സംവരണപരിധി 50 ശതമാനത്തിന് മേല്‍ കടക്കരുതെന്ന് സുപ്രിംകോടതി. സംവരണം 50 ശതമാനം കടക്കരുതെന്ന 1992ലെ ഇന്ദിരാ സാഹ്നി കേസിലെ വിധി പുനഃപരിശോധിക്കണമെന്നാവശ്യപ്പെട്ടുള്ള ഹരജി തള്ളിയാണ് ജസ്റ്റിസ് അശോക് ഭൂഷന്റെ അധ്യക്ഷതയിലുള്ള അഞ്ചംഗ ഭരണഘടനാ ബെഞ്ച് സുപ്രധാനവിധി പുറപ്പെടുവിച്ചത്. ഇന്ദിരാസാഹ്നി കേസിലെ വിധി പുനഃപരിശോധിക്കേണ്ടതില്ലെന്നതിനോട് ഭരണഘടനാ ബെഞ്ചിലെ എല്ലാവരും യോജിച്ചു. മറാത്താ സംവരണവുമായി ബന്ധപ്പെട്ട നിയമം നടപ്പാക്കുകയാണെങ്കില്‍ മഹാരാഷ്ട്രയില്‍ സംവരണം 65 ശതമാനമാവുമെന്നും ജസ്റ്റിസ് ഭൂഷണ്‍ ചൂണ്ടിക്കാട്ടി.

 

മറാത്തികള്‍ക്ക് സംവരണം ഏര്‍പ്പെടുത്തിയുള്ള മഹാരാഷ്ട്ര സര്‍ക്കാരിന്റെ നടപടി ചോദ്യംചെയ്തുള്ള ഹരജികളിലാണ് കോടതി വിധി പറഞ്ഞത്. മണ്ഡല്‍ കമ്മിഷന്‍ റിപ്പോര്‍ട്ട് നടപ്പാക്കിയ സര്‍ക്കാരിന്റെ തീരുമാനം ശരിവച്ച്, സാമൂഹികമായും സാമ്പത്തികമായും  പിന്നാക്കം നില്‍ക്കുന്ന വിഭാഗങ്ങള്‍ക്ക് സര്‍ക്കാര്‍ ജോലികളിലും വിദ്യാഭ്യാസ സ്ഥാപനങ്ങളിലുമുള്ള സംവരണം 50 ശതമാനമാക്കി നിശ്ചയിച്ച 1992ലെ വിധി പുനഃപരിശോധിക്കണോ വേണ്ടയോ എന്ന കാര്യത്തിലാണ് കോടതി ഇന്നലെ തീരുമാനം അറിയിച്ചത്.

 

സംവരണം 50 ശതമാനത്തില്‍ കവിയുന്നത് തുല്യത അനുശാസിക്കുന്ന ഭരണഘടനയിലെ 14, 15 അനുച്ഛേദങ്ങളുടെ ലംഘനമാണ്. പിന്നാക്ക വിഭാഗങ്ങളുടെ പട്ടിക നിശ്ചയിക്കാനുള്ള അധികാരം സംസ്ഥാനങ്ങള്‍ക്കല്ല. ഇതുസംബന്ധിച്ച സംസ്ഥാനങ്ങളുടെ അധികാരം 102ാം ഭരണഘടനാ ഭേദഗതി റദ്ദാക്കുന്നുണ്ട്.

 

സാമൂഹികമായി പിന്നാക്കം      നില്‍ക്കുന്ന വിഭാഗങ്ങളില്‍ കൂട്ടിച്ചേര്‍ക്കാനോ അതില്‍ നിന്ന് ഒഴിവാക്കാനോ ഉള്ള അധികാരം രാഷ്ട്രപതിക്കും പാര്‍ലമെന്റിനുമാണ്. ഈ സാഹചര്യത്തില്‍ സംവരണവിഭാഗങ്ങളില്‍ കൂട്ടിച്ചേര്‍ക്കലിനോ ഒഴിവാക്കപ്പെടലിനോ സംസ്ഥാനങ്ങള്‍ക്ക് രാഷ്ട്രപതിയോടോ പാര്‍ലമെന്റിനോടോ ശുപാര്‍ശചെയ്യാവുന്നതാണ്- ബെഞ്ച് വ്യക്തമാക്കി.

അതേസമയം, ദേശീയ പിന്നാക്ക കമ്മിഷന് ഭരണഘടനാ പദവിയും സംവരണവിഭാഗങ്ങളുടെ പട്ടിക തയാറാക്കാനുള്ള അധികാരവും നല്‍കുന്ന 2018ലെ 102ാം ഭരണഘടനാ ഭേദഗതിയെ അഞ്ചംഗബെഞ്ച് ഐകകണ്‌ഠ്യേന അംഗീകരിച്ചെങ്കിലും, സംവരണവിഭാഗങ്ങളെ തീരുമാനിക്കുന്നതിലുള്ള സംസ്ഥാനങ്ങളുടെ അധികാരത്തെ ബാധിക്കുമോയെന്ന കാര്യത്തില്‍ ബെഞ്ചിനിടയില്‍ ഭിന്നതയുണ്ടായി. ബെഞ്ചിലെ ജസ്റ്റിസുമാരായ രവീന്ദ്രഭട്ടും എല്‍. നാഗേശ്വര്‍ റാവുവും ഹേമന്ത്ഗുപ്തയും ഇക്കാര്യത്തില്‍ യോജിച്ചപ്പോള്‍ ജഡ്ജിമാരായ അശോക് ഭൂഷണും എസ്. അബ്ദുല്‍നസീറും വിജോയിപ്പ് രേഖപ്പെടുത്തി പ്രത്യേക വിധിയും എഴുതി.

 

വിഷയത്തില്‍ എല്ലാ സംസ്ഥാനങ്ങളുടേയും നിലപാട്കൂടി തേടിയ ശേഷമാണ് കോടതി വിധി പറഞ്ഞത്.

ഇന്ദിരാസാഹ്നി കേസില്‍ വിധിപറഞ്ഞത് ഒന്‍പതംഗ വിശാല ബെഞ്ചായതിനാല്‍ ഈ കേസ്    പുനഃ പരിശോധിക്കുകയാണെങ്കില്‍ 11 അംഗ ബെഞ്ചിലേക്കു വിടേണ്ടതായിരുന്നു.  102ാംഭരണഘടാ ഭേദഗതി തെറ്റാണെന്നും സംവരണപട്ടിക തീരുമാനിക്കാനുള്ള അധികാരം സംസ്ഥാനങ്ങള്‍ക്ക് വേണമെന്നും സംവരണപരിധി 50 കവിയണമെന്നുമായിരുന്നു കേരളത്തിന്റെ        നിലപാട്.