ഗാസയിലെ ഇസ്‌റാഈല്‍ അതിക്രമങ്ങള്‍ക്കെതിരെ പ്രതിഷേധവുമായി അമേരിക്കയിലെ ക്രിസ്തുമത വിശ്വാസികളുടെ സംഘടന. ഗാസയില്‍ ഇസ്‌റാഈല്‍ ഭക്ഷ്യവസ്തുക്കള്‍ നിഷേധിച്ച് കുഞ്ഞുങ്ങളെയടക്കം പട്ടിണിക്കിടുന്നതിന് എതിരെ ഗാസക്കാര്‍ ഭക്ഷിക്കുന്നത് വരെ കോണ്‍ഗ്രസും ഭക്ഷണം കഴിക്കേണ്ട' എന്ന മുദ്രാവാക്യവുമായാണ് ക്രിസ്ത്യന്‍സ് ഫോര്‍ എ ഫ്രീ ഫലസ്തീന്‍ (Christians for a Free Palestine) എന്ന സംഘടനയുടെ ആഭിമുഖ്യത്തിലുള്ള സമരക്കാര്‍ കാന്റീന്‍ വളഞ്ഞത്.

'ഭക്ഷണമാണ് അയക്കേണ്ടത്, ബോംബുകളല്ല'', ''ബ്രഡ് മുറിക്കുക, ശരീരങ്ങളല്ല'' തുടങ്ങിയ ബാനറുകളും പ്രതിഷേധക്കാര്‍ ഉയര്‍ത്തി. കോഡ്പിങ്ക് എന്ന ഫെമിനിസ്റ്റ് സംഘടനയും ഇസ്രാഈല്‍ വിരുദ്ധ സമരത്തില്‍ പങ്കുചേര്‍ന്നു.ചൊവ്വാഴ്ച ഉച്ച 12.30 ഓടെ ഡസന്‍ കണക്കിന് പ്രവര്‍ത്തകര്‍ സെനറ്റ് ഓഫിസ് കെട്ടിടത്തിലേക്ക് ഇരച്ചുകയറിയ സംഘം കഫ്റ്റീരിയ ഉപരോധിക്കുകയായിരുന്നു. സംഭവത്തില്‍ 30 നിയുക്ത വൈദികര്‍ ഉള്‍പ്പെടെ 55 പേരെ അറസ്റ്റ് ചെയ്തതായി ക്രിസ്ത്യന്‍സ് ഫോര്‍ എ ഫ്രീ ഫലസ്തീന്‍ അറിയിച്ചു. പിന്നീട് ഇവരെ ജാമ്യത്തില്‍ വിട്ടയച്ചു. പ്രതിഷേധത്തെ തുടര്‍ന്ന് കഫ്റ്റീരിയ അടച്ചിട്ടു.

'ഗാസയില്‍ സ്ഥിരമായ വെടിനിര്‍ത്തലിന് പ്രേരിപ്പിക്കണമെന്നും യുഎന്‍ആര്‍ഡബ്ല്യുഎക്കുള്ള സഹായം പുനഃസ്ഥാപിക്കണമെന്നും ഇസ്രാഈലിനുള്ള സൈനിക ധനസഹായം അവസാനിപ്പിക്കണമെന്നും ആവശ്യപ്പെട്ട് യു.എസിലെ 50-ലധികം ക്രിസ്ത്യന്‍ നേതാക്കള്‍ സമാധാനപരമായി സെനറ്റ് കഫറ്റീരിയ ഉപരോധിച്ചു. ഗാസയിലേക്ക് ഭക്ഷണം അയയ്ക്കുകയും 33,000 ഫലസ്തീനികളെ കൊന്നൊടുക്കിയവര്‍ക്ക് യുഎസ് സഹായം നല്‍കുന്നത് നിര്‍ത്തുകയും ചെയ്യുന്നത് വരെ സെനറ്റ് കഫറ്റീരിയയില്‍ നിന്ന് ആരെയും ഭക്ഷണം കഴിക്കാൻ അനുവദിക്കില്ലെന്ന് പ്രഖ്യാപിച്ചായിരുന്നു സമരം' സംഘടന അറിയിച്ചു.